Resei Qorǵanys ministrligi Jeńis kúnine orai ýaqytsha bitim jariialanǵanyn málimdedi. Al Ýkraina tarapy buǵan jaýap retinde óz ustanymyn bildirip, «tynyshtyq rejimin» engizetinin habarlady, dep habarlaidy dalanews.kz
Resei: 8–9 mamyrda bitim jariialanady
Reseidiń Qorǵanys ministrligi Joǵarǵy bas qolbasshy, prezident Vladimir Pýtin sheshimimen 8–9 mamyr kúnderi Jeńis kúnin atap ótýge bailanysty bitim jariialanatynyn málimdedi.
Resmi habarlamada Resei tarapy Ýkraina da osy qadamdy qoldaidy dep úmittenetini aitylǵan.
«Ýkraina tarapy da osy bastamany qoldaidy dep esepteimiz. Sonymen qatar Kiev rejimi basshysynyń Erevanda ótken Eýropalyq saiasi qoǵam sammitinde jasaǵan málimdemesine nazar aýdardyq. Onda dál 9 mamyr kúni Máskeýge soqqy jasaý týraly qaýip aitylǵan. Resei Qarýly kúshteri merekelik is-sharalardyń qaýipsizdigin qamtamasyz etý úshin barlyq qajetti sharalardy qabyldaidy», – delingen ministrlik málimdemesinde.
Sondai-aq Resei tarapy Ýkraina Jeńistiń 81 jyldyǵyn atap ótýge kedergi keltirýge árekettengen jaǵdaida, Kievtiń ortalyǵyna jappai zymyran soqqysy jasalýy múmkin ekenin eskertken.
Ýkraina: 6 mamyrdan bastap «tynyshtyq rejimi»
Birneshe saǵattan keiin Ýkraina prezidenti Vladimir Zelenskii óz jaýabyn jariialap, atysty toqtatý rejimin engizetinin málimdedi.
Onyń aitýynsha, Resei tarapynan Ýkrainaǵa soǵys qimyldaryn toqtatý sharttaryna qatysty resmi usynys túspegen.
«Búginge deiin Ýkrainaǵa áskeri áreketterdi toqtatý sharttary jóninde resmi túrde eshqandai usynys jasalǵan joq. Reseidiń áleýmettik jelilerinde taraǵan málimdemelerge súiený múmkin emes. Biz úshin adam ómiri kez kelgen merekeden áldeqaida mańyzdy. Osyǵan bailanysty 6 mamyrǵa qaraǵan túngi saǵat 00:00-den bastap tynyshtyq rejimin jariialaimyz», – dedi Zelenskii.
Ýkraina basshysy eldiń atalǵan ýaqyttan bastap «aina qaǵidaty» boiynsha áreket etetinin, iaǵni qarsy taraptyń qadamdaryna sáikes jaýap beretinin atap ótti.
