Bas prokýratýra AES qurylysyna qatysty referendým barysynda zańbuzýshylyqtar tirkelmegenin málimdedi. Quqyq qorǵaý organdary daýys berý prosesiniń zań talaptaryna saı ótip jatqanyn atap ótti, dep habarlaıdy Dalanews.kz.
Bas prokýratýranyń qoǵamdyq múddelerdi qorǵaý departamentiniń basshysy Bekjan Qaramanov referendým kezinde zańbuzýshylyqtar oryn almaǵanyn aıtty. Onyń sózinshe, Ortalyq saılaý komısıasy nemese basqa da memlekettik organdar tarapynan eshqandaı ereje buzylǵan joq.
"Búgingi kúni saılaýaldy úgit-nasıhat júrgizýge jáne saılaý ýchaskelerinde saýalnamalardyń nátıjelerin jarıalaýǵa qatań tyıym salynady. Qazirgi ýaqytta mundaı zańbuzýshylyq faktileri tirkelgen joq", – dep málimdedi Qaramanov.
Sonymen qatar, İshki ister mınıstrliginiń resmı ókili Shyńǵys Álekeshev qazirgi kezde qoǵamdyq tártiptiń saqtalyp otyrǵanyn habarlady. Ol polısıa qyzmetkerleri táýlik boıy kezekshilikke turǵanyn jáne daýys berý oryndarynyń qaýipsizdigi tolyq qamtamasyz etilgenin málimdedi.
"Referendým ótetin oryndardyń tehnıkalyq beriktigi, órt qaýipsizdigi jáne terorızmge qarsy qorǵanysy tekserilip, barlyq ýchaskeler táýlik boıy kúzetpen qamtamasyz etilgen. Polısıa qyzmetkerleri daýys berý zalyna tek qoǵamdyq tártipti buzý jaǵdaıynda ǵana shaqyrylady", – dep túsindirdi Álekeshev.
Qoǵamdyq tártiptiń buzylǵany týraly habarlaý qajet bolsa, ishki ister mınıstrligi azamattardy kezekshi ýchaskelerge nemese 102 nómirine júginýge shaqyrdy.
Eske sala keteıik, daýys berý tizimine 12,3 mıllıonǵa jýyq qazaqstandyq engizilgen.
Referendýmǵa 30 shet memleket pen tórt halyqaralyq uıymnyń (Táýelsiz Memleketter Dostastyǵy, Shanhaı yntymaqtastyq uıymy, Túrki memleketteri uıymy, Azıadaǵy ózara is-qımyl jáne senim sharalary jónindegi keńes) atynan 177 baıqaýshy qatysady.
Daýys berý barysyn 14 memlekettiń ortalyq saılaý organdarynyń ókilderi, sonyń ishinde Ázirbaıjan, Belarýs, Tájikstan jáne Ózbekstan ortalyq saılaý organdarynyń tóraǵalary da baqylap otyr.
Qazaqstan Respýblıkasynyń Syrtqy ister mınıstrligi 37 elden 200 sheteldik jýrnalıserdi akkredıttedi, olar da respýblıkalyq referendýmdy baqylap, aqparat taratady.
Elimizde barlyǵy 10 323 saılaý ýchaskesi jumys isteıdi, sonymen qatar, 59 elde sheteldik mekemelerde ashylǵan 74 saılaý ýchaskesi bar. Referendým nátıjeleri daýys berý kúninen bastap jeti kúnnen keshiktirilmeı buqaralyq aqparat quraldarynda jarıalanady.
