باس پروكۋراتۋرا اەس قۇرىلىسىنا قاتىستى رەفەرەندۋم بارىسىندا زاڭبۇزۋشىلىقتار تىركەلمەگەنىن مالىمدەدى. قۇقىق قورعاۋ ورگاندارى داۋىس بەرۋ پروسەسىنىڭ زاڭ تالاپتارىنا ساي ءوتىپ جاتقانىن اتاپ ءوتتى، دەپ حابارلايدى Dalanews.kz. 

باس پروكۋراتۋرانىڭ قوعامدىق مۇددەلەردى قورعاۋ دەپارتامەنتىنىڭ باسشىسى بەكجان قارامانوۆ رەفەرەندۋم كەزىندە زاڭبۇزۋشىلىقتار ورىن الماعانىن ايتتى. ونىڭ سوزىنشە، ورتالىق سايلاۋ كوميسسياسى نەمەسە باسقا دا مەملەكەتتىك ورگاندار تاراپىنان ەشقانداي ەرەجە بۇزىلعان جوق.

"بۇگىنگى كۇنى سايلاۋالدى ۇگىت-ناسيحات جۇرگىزۋگە جانە سايلاۋ ۋچاسكەلەرىندە ساۋالنامالاردىڭ ناتيجەلەرىن جاريالاۋعا قاتاڭ تىيىم سالىنادى. قازىرگى ۋاقىتتا مۇنداي زاڭبۇزۋشىلىق فاكتىلەرى تىركەلگەن جوق"، – دەپ مالىمدەدى قارامانوۆ.

سونىمەن قاتار، ىشكى ىستەر مينيسترلىگىنىڭ رەسمي وكىلى شىڭعىس الەكەشيەۆ قازىرگى كەزدە قوعامدىق ءتارتىپتىڭ ساقتالىپ وتىرعانىن حابارلادى. ول پوليسيا قىزمەتكەرلەرى تاۋلىك بويى كەزەكشىلىككە تۇرعانىن جانە داۋىس بەرۋ ورىندارىنىڭ قاۋىپسىزدىگى تولىق قامتاماسىز ەتىلگەنىن مالىمدەدى.

"رەفەرەندۋم وتەتىن ورىنداردىڭ تەحنيكالىق بەرىكتىگى، ءورت قاۋىپسىزدىگى جانە تەرروريزمگە قارسى قورعانىسى تەكسەرىلىپ، بارلىق ۋچاسكەلەر تاۋلىك بويى كۇزەتپەن قامتاماسىز ەتىلگەن. پوليسيا قىزمەتكەرلەرى داۋىس بەرۋ زالىنا تەك قوعامدىق ءتارتىپتى بۇزۋ جاعدايىندا عانا شاقىرىلادى"، – دەپ ءتۇسىندىردى الەكەشيەۆ.

قوعامدىق ءتارتىپتىڭ بۇزىلعانى تۋرالى حابارلاۋ قاجەت بولسا، ىشكى ىستەر مينيسترلىگى ازاماتتاردى كەزەكشى ۋچاسكەلەرگە نەمەسە 102 نومىرىنە جۇگىنۋگە شاقىردى.

ەسكە سالا كەتەيىك، داۋىس بەرۋ تىزىمىنە 12،3 ميلليونعا جۋىق قازاقستاندىق ەنگىزىلگەن.

رەفەرەندۋمعا 30 شەت مەملەكەت پەن ءتورت حالىقارالىق ۇيىمنىڭ (تاۋەلسىز مەملەكەتتەر دوستاستىعى، شانحاي ىنتىماقتاستىق ۇيىمى، تۇركى مەملەكەتتەرى ۇيىمى، ازياداعى ءوزارا ءىس-قيمىل جانە سەنىم شارالارى جونىندەگى كەڭەس) اتىنان 177 بايقاۋشى قاتىسادى.

داۋىس بەرۋ بارىسىن 14 مەملەكەتتىڭ ورتالىق سايلاۋ ورگاندارىنىڭ وكىلدەرى، سونىڭ ىشىندە ءازىربايجان، بەلارۋس، تاجىكستان جانە وزبەكستان ورتالىق سايلاۋ ورگاندارىنىڭ ءتوراعالارى دا باقىلاپ وتىر.

قازاقستان رەسپۋبليكاسىنىڭ سىرتقى ىستەر مينيسترلىگى 37 ەلدەن 200 شەتەلدىك جۋرناليستەردى اككرەديتتەدى، ولار دا رەسپۋبليكالىق رەفەرەندۋمدى باقىلاپ، اقپارات تاراتادى.

ەلىمىزدە بارلىعى 10 323 سايلاۋ ۋچاسكەسى جۇمىس ىستەيدى، سونىمەن قاتار، 59 ەلدە شەتەلدىك مەكەمەلەردە اشىلعان 74 سايلاۋ ۋچاسكەسى بار. رەفەرەندۋم ناتيجەلەرى داۋىس بەرۋ كۇنىنەن باستاپ جەتى كۇننەن كەشىكتىرىلمەي بۇقارالىق اقپارات قۇرالدارىندا جاريالانادى.