Qazaqstanda nesie naryǵy týraly sóz bolǵanda, ádette halyqtyń tutynýshylyq qaryzyna kóbirek nazar aýdarylady. Alaida biyl shaǵyn jáne orta biznesti qarjylandyrý kórsetkishi de joǵary ósim kórsetti, dep habarlaidy dalanews.kz.
QZ Economy.Taldaý málimetinshe, 1 tamyzdaǵy jaǵdai boiynsha, bankterdiń shaǵyn jáne orta kásipkerlikke bergen nesiesi 12,4 trln teńgege jetken. Jyl basynan beri bul kórsetkish 12 paiyz ósti. Al osy kezeńde jalpy ekonomikaǵa berilgen nesie kólemi 5,2 paiyz, jeke tulǵalardy nesielendirý 5,5 paiyz artqan.
Shaǵyn bizneske berilgen qaryz kólemi jyl basynan beri 13 paiyz kóbeiip, 9,2 trln teńgeni qurady. Orta biznesti nesielendirý de ósip, 3,2 trln teńgege jetti. Bul ótken kórsetkishten 8,8 paiyz joǵary.
Qazaqstanda búginde shaǵyn jáne orta biznestiń 2 millionnan astam sýbektisi tirkelgen. Olardyń shamamen 70 paiyzy – jeke kásipkerler. Sondyqtan bankter kásipkerlerdi jekelegen shaǵyn qaryz alýshylar retinde emes, qarjy naryǵyndaǵy aýqymdy ári derbes klienttik top retinde qarastyra bastady.
Bul ózgeris bank qyzmetterinen de baiqalady. Qazir kásipkerlerge arnalǵan mobildi qosymshalar, tsifrlyq kabinetter, qashyqtan nesie berý jáne tólem qabyldaý qyzmetteri kóbeiip keledi. Qarjy uiymdary biznestiń negizgi banki ataný úshin jańa ónimder usynyp, ózara básekeni kúsheitýde.
Shaǵyn jáne orta biznesti nesielendirýdiń artýy ekonomika úshin mańyzdy belgi. Óitkeni kásipkerlerge baǵyttalǵan qarjy jańa taýarlar men qyzmetterdiń paida bolýyna, óndiristiń keńeiýine jáne jumys oryndarynyń ashylýyna múmkindik beredi.
Degenmen nesieniń qalai jumsalatyny da mańyzdy. Eger qarajat tek biznestiń kúndelikti shyǵyndaryn óteýge emes, jańa jabdyq satyp alýǵa, zamanaýi tehnologiialardy engizýge, óndiristi ulǵaitýǵa jáne jańa jobalardy iske qosýǵa baǵyttalsa, shaǵyn jáne orta kásipkerlik ekonomikalyq ósimniń jańa qozǵaýshy kúshine ainalýy múmkin.
