Қазақстанда несие нарығы туралы сөз болғанда, әдетте халықтың тұтынушылық қарызына көбірек назар аударылады. Алайда биыл шағын және орта бизнесті қаржыландыру көрсеткіші де жоғары өсім көрсетті, деп хабарлайды dalanews.kz.
QZ Economy.Талдау мәліметінше, 1 тамыздағы жағдай бойынша, банктердің шағын және орта кәсіпкерлікке берген несиесі 12,4 трлн теңгеге жеткен. Жыл басынан бері бұл көрсеткіш 12 пайыз өсті. Ал осы кезеңде жалпы экономикаға берілген несие көлемі 5,2 пайыз, жеке тұлғаларды несиелендіру 5,5 пайыз артқан.
Шағын бизнеске берілген қарыз көлемі жыл басынан бері 13 пайыз көбейіп, 9,2 трлн теңгені құрады. Орта бизнесті несиелендіру де өсіп, 3,2 трлн теңгеге жетті. Бұл өткен көрсеткіштен 8,8 пайыз жоғары.
Қазақстанда бүгінде шағын және орта бизнестің 2 миллионнан астам субъектісі тіркелген. Олардың шамамен 70 пайызы – жеке кәсіпкерлер. Сондықтан банктер кәсіпкерлерді жекелеген шағын қарыз алушылар ретінде емес, қаржы нарығындағы ауқымды әрі дербес клиенттік топ ретінде қарастыра бастады.
Бұл өзгеріс банк қызметтерінен де байқалады. Қазір кәсіпкерлерге арналған мобильді қосымшалар, цифрлық кабинеттер, қашықтан несие беру және төлем қабылдау қызметтері көбейіп келеді. Қаржы ұйымдары бизнестің негізгі банкі атану үшін жаңа өнімдер ұсынып, өзара бәсекені күшейтуде.
Шағын және орта бизнесті несиелендірудің артуы экономика үшін маңызды белгі. Өйткені кәсіпкерлерге бағытталған қаржы жаңа тауарлар мен қызметтердің пайда болуына, өндірістің кеңеюіне және жұмыс орындарының ашылуына мүмкіндік береді.
Дегенмен несиенің қалай жұмсалатыны да маңызды. Егер қаражат тек бизнестің күнделікті шығындарын өтеуге емес, жаңа жабдық сатып алуға, заманауи технологияларды енгізуге, өндірісті ұлғайтуға және жаңа жобаларды іске қосуға бағытталса, шағын және орта кәсіпкерлік экономикалық өсімнің жаңа қозғаушы күшіне айналуы мүмкін.
