Almaty oblysynda órt sóndirý beketteri jetkiliksiz. Óńir basshysy Marat Sultanǵaziev Raiymbek aýdanyndaǵy sapary barysynda saladaǵy qajettilikti atap ótip, Narynqoldaǵy órt sóndirý bóliminiń ashylýyna qatysty, – dep habarlaidy Dalanews.kz Almaty oblysy ákiminiń baspasóz qyzmetine silteme jasap.
Raiymbek aýdany taýly, nýly aimaq. Sondyqtan tótenshe jaǵdailar qyzmeti men órt sóndirý beketteri qajet-aq.
Jalpy oblysta mamandandyrylǵan bólimshelermen qatar, sala mamandaryna da suranys joǵary. Tapshylyq bar. Almaty oblysynda 474 tótenshe jaǵdailar qyzmetkeri bar. Al, qajettilik myńnan asady.
Narynqoldaǵy órt sóndirý bóliminiń ashylýynda oblys basshysy osyndai statistikany atap ótti. Eki eselik júktememen qyzmet etip júrgen azamattarǵa alǵys bildirdi.
Búginde Almaty oblysynda 13 órt sóndirý bólimi bar. Taǵy 18-i qajet. Tótenshe jaǵdailar ministrliginiń komitet tóraǵasy Ramil Kamalov bólimshelerdiń ashylýyna qoldaý kórsetip jatqan oblys basshylyǵyna rizashylyǵyn jetkizdi.
– Elimizdiń 80 paiyz aýmaǵynda tabiǵi órttiń qaýiptiligi joǵary. Sondyqtan órt qaýipsizdigi eń birinshi kezekte turǵan másele. Ári barshamyzǵa ortaq. Shyny kerek, respýblikada dál osyndai 121 depo qajet. Al Almaty oblysyna 18 nysandy salýymyz kerek. Almaty oblysy ákimdigi men apparaty bul iske ary qaraida qoldaý kórsetetine senemiz, – dedi komitet ókili.
Jańa ashylǵan nysan 288 mln teńgege salynyp, jasaqtalǵan. Mamandarǵa qajettiń bári bar. Munda 17 qyzmetker eńbek etedi.
