Qyrkúiekte prezident joldaýy jariialanady. Al odan bir aidai ýaqyt buryn biýdjet qaita qaralyp, jospardyń qalai oryndalǵany belgili bolady. Qai tusta aqsha jetpegeni, qai jerde toltyrý keregi de tamyzda kózge kórinedi. Bylaisha aitqanda bul — biýdjettiń «tamyryn» basatyn kez.
Joldaýda damýǵa baǵyttalǵan uzaq merzimdi baǵdarlamalar aiasynda prezident tapsyrmalar berip, merzimin bekitedi. Odan keiin birneshe kún ishinde premer-ministr úkimetti jinap, ol jerde ministrler tapsyrmany qalai oryndaitynyn, qarajat jete me — aitady. Prezident ákimshiligi aimaq ákimderiniń basyn qosyp, olar da ózine qatysty tapsyrmalardy qalai oryndaitynyn aityp, esep beredi. Qarjyger Rasýl Rysmambetov Facebook-tegi paraqshasynda osy oraida Qarjy ministrliginiń moinyndaǵy jaýapkershiliktiń aýyr ekenin atap ótti. «Bul rette menińshe, basty ról — Qarjy ministrliginde. Óitkeni kassa — sonyń qolynda. Ol biýdjetti tolyqtyryp, barlyq baǵdarlamany qarjylandyrýy kerek. Sóite tura salyq jinaimyn dep biznesti de alqymnan almaýy qajet. Kóbine biznes onsha salyq tólegisi kelmeidi, «tiisti qoldaý almai otyrmyn ne tólegen salyqqa sai memlekettik qyzmet almaimyn» deidi. Osylaisha Qarjy ministrligine memlekettik organdar, aimaqtar men kvazimemlekettik sektordyń «tizginin» (olar da aqsha alǵysy keledi) tartýǵa týra keledi. Ákimder, ministrlikter men kvazimemlekettik sektorda lobbi myqty bolǵandyqtan, Qarjymin aqsha únemdeý úshin olarmen taitalasýǵa májbúr» deidi sarapshy.
Rysmambetov 90-jyldary Qarjy ministri bolǵan Aleksandr Pavlovtyń kezin eske alyp, onyń biligi joǵary bolǵanyn atap ótti. «Internet dáýiri bastalmaǵan kezde Pavlov qolyna kalkýliator men qaryndash alyp, 90-jyldary jaǵdai aýyr bolsa da, biýdjetti táptishtep esepteitin. Shahterlar ereýilge shyǵyp, kásiporyndar ailap ailyq almaǵan kezderi osy Pavlovtyń komandasy aman alyp shyqty desem bolady» deidi ol.
Sarapshy Qarjy ministrine endi eki jaqtyń da yńǵaiyna qaramai, biznesten salyq alyp, memlekettik apparattyń «tábetin» qatar azaitatyn kez keldi degen pikirde. «On jerden onsha emes estilse de, qazir Mádi Takiev biýdjetti qutqaryp qalatyn bolsa, onda jeńilgeni. Ony onsyz da kóbi unatpaidy, budan keiin tipti barlyq jerde ústinnen shaǵym túsetin bolady. Iá, buǵan deiin Kabinetter biýdjet máselesine kelgende jumsaqtaý bolǵan. Biraq endi óte qatań ári burynǵydan basqasha sheshimder qabyladýǵa týra keledi. Bastysy, Qarjy ministriniń eki jaqpen shaiqasýǵa ákimshilik resýrsy jetse boldy. Áitpese, kóp uzamai Ulttyq qordyń túbi kórinedi» dep sózin qorytyndylady qarjyger.
