QMA Shymkent qalasy boiynsha departamenti bilim berý salasyna bólingen biýdjet qarajatyn jymqyrý faktisi boiynsha tergep-tekserýdi aiaqtady, dep habarlaidy dalanews.kz.
Tergeý amaldaryna sai, 2018–2023 jyldar aralyǵynda «Ońtústik Qazaqstan joǵary meditsinalyq kolledji» JShS men «Ońtústik Qazaqstan gýmanitarlyq-qarjy kolledji» JShS quryltaishysy jalǵan oqytý shemasyn uiymdastyrǵan.
Qylmystyq shemaǵa kolledj basshylary, býhgalterler jáne ózge de bailanysy bar tulǵalar qatysqan.
Azamattar oqý oryndaryna formaldy túrde qabyldanǵanymen, is júzinde bilim almaǵan. Bul memlekettik bilim berý tapsyrysy jáne kadrlardy qaita daiarlaý baǵdarlamalary aiasynda biýdjetten qarjy alýǵa múmkindik bergen.
Shema jalǵan oqýǵa qabyldaý jáne jumysqa ornalastyrý týraly buiryqtardy rásimdeý, qujattardy rastaý úshin elektrondyq tsifrlyq qoltańbalardy paidalaný, sondai-aq oryndalǵan jumystar týraly jalǵan aktiler jasaý arqyly júzege asyrylǵan.
Sonymen qatar, meditsinalyq kolledjdiń aqyly bóliminde oqyǵan stýdentterdiń bir bóligi memleket esebinen bilim alýshylar retinde rásimdelgeni anyqtaldy.
Budan bólek, «Ońtústik Qazaqstan gýmanitarlyq-qarjy kolledji» is júzinde jumys istemegen jáne tek biýdjet qarajatyn alý úshin formaldy qurylym retinde paidalanylǵan.
Memleketke keltirilgen jalpy zalal 1,3 mlrd teńgeden asty.
Bir qyzyǵy, shemany uiymdastyrýshy buǵan deiin jasaǵan jymqyrý faktisi úshin sońǵy úsh jyl boiy bas bostandyǵynan aiyrý oryndarynda bola tura, zańsyz áreketterdi sol jerden basqarǵan.
Tergeý barysynda kúdiktiler 65 mln teńge kólemindegi zalaldy erikti túrde ótegen. Sot sanktsiiasymen 3 páterge, onyń ishinde Dýbai qalasyndaǵy páterge, 3 turǵyn úige jáne 3 avtokólikke tyiym salyndy.
Eki kúdiktige qatysty qamaýda ustaý túrindegi bultartpaý sharasy, taǵy úsh tulǵaǵa qatysty eshqaida ketpeý jáne tiisti minez-qulyq týraly qolhat túrindegi bultartpaý sharasy qoldanyldy. Qylmystyq is sotqa joldandy.
