Búgin Qyzylordada álemge áigili ispandyq «Roca Group» kompaniiasynyń sanitarlyq-tehnikalyq jabdyqtar zaýytynyń irgetasy qalandy, dep habarlaidy dalanews.kz.
Oǵan oblys ákimi Murat Ergeshbaev, «Roca Group» kompaniiasynyń bas direktory DanielHýrado Ernandes, Ispaniia elshiliginiń saýda-ekonomikalyq keńesshisi Hesýs Vidal Borrelia, quqyq qorǵaý organdarynyń birinshi basshylary, qurylys kompaniialarynyń direktorlary, ziialy qaýym ókilderi men el aǵalary qatysty.
«Roca Group» – júz jyldan astam tarihy bar, santehnikalyq jabdyqtar óndirý salasyndaǵy álemdik kóshbasshylardyń biri. Kompaniia álem boiynsha 78 óndiristik alańdy basqarady. Onda 20 myńnan astam adam eńbek etedi. Ónimderi 170-ten astam elge eksporttalady.
Rásimde oblys ákimi Memleket basshysy Qasym-Jomart Toqaevtyń investitsiia tartý jáne zamanaýi óndiristi damytý jónindegi tapsyrmasyna toqtalyp, óńirde qolaily investitsiialyq ahýal qalyptasqanyn atap ótti.
«Memleket basshysy «Jańa investitsiialar eń aldymen elimizdegi zamanaýi ónerkásiptiń negizin qalyptastyrýǵa baǵyttalýy kerek» degen bolatyn. Keiingi jyldary óńirimizdiń investitsiialyq áleýeti artyp, iri jobalar tabysty júzege asýda.Aimaq ekonomikasyna 2,3 trln teńgeden astam investitsiia tartyldy. Aldaǵy úsh jylda 1,9 trln teńgege 48 investitsiialyq jobany júzege asyrý josparlanýda. Nátijesinde 10 myńnan astam jańa jumys orny ashylady.
Búgin biz elimiz úshin mańyzdy, joǵary tehnologiialyq óndiris ornynyń kapsýlasyn salý rásiminiń kýási bolyp otyrmyz. Osyndai aýqymdy jobany Syr óńirinde júzege asyrǵany úshin ispandyq «Roca Group» kompaniiasyna rizashylyǵymdy bildiremin. Bul bastama óńir ekonomikasyna jańa serpin berip, eksporttyq áleýetti arttyrýǵa jáne jańa jumys oryndaryn ashýǵa múmkindik beredi. Biz otandyq jáne sheteldik investorlarmen árdaiym ashyq ári senimdi qarym-qatynas ornatyp, nátijeli jumys isteýge daiynbyz, – dedi Murat Nálqojauly.
Jiynda oblys prokýrory Rizabek Ojarov pen «Roca Group» seriktestiginiń bas direktory Daniel Hýrado Ernandes sóz sóilep, el aǵasy Ibragim Ábibýllaev aq batasyn berdi.
Aita ketý kerek,joba «KAZAKH INVEST» UK» AQ qoldaýymen júzege asyrylýda.
«Roca Group» kompaniiasynyń zaýytyn Qyzylorda óńirinde salý týraly kelisim oblysty Nurlybek Nálibaev basqarǵan kezeńde jasalyp, Úkimet deńgeiinde tiisti qujattarǵa qol qoiylǵan bolatyn.
Bul – Qazaqstandaǵy ekologiialyq qaýipsizdiktiń halyqaralyq standarttaryna sáikes keletin sanitarlyq-tehnikalyq ónimder shyǵaratyn alǵashqy óndiris orny.
Zaýytqa 24 gektar jer telimi bólindi, 44,1 mlrd teńge investitsiia salynady. Jyldyq óndiristik qýaty 500 myń buiymǵa deiin jetedi. Óndirilgen ónim Qazaqstannyń ishki naryǵyna jetkizilip, Ortalyq Aziia elderine eksporttalady.
Sonymen qatar 300-ge jýyq turaqty jumys orny ashylady, jergilikti mamandardy oqytý jáne olardyń biliktiligin arttyrý kózdelgen. Kompaniia jyl sońyna deiin smesitelder men installiatsiialyq júielerdi qurastyratyn óndiris ornyn iske qosýdy josparlap otyr. Al kompaniia ónimderi usynylatyn shoýrýmdar Astana jáne Almaty qalalarynda maýsym aiynda ashylady.
