Qyzylorda oblysynyń Qazaly aýdanynda balabaqsha esepshisiniń biýdjet qarajatyn asa iri mólsherde jymqyrdy degen kúdikke ilinýine bailanysty sotqa deiingi tergeý bastaldy, dep habarlaidy dalanews.kz.
Qyzylorda oblysynyń prokýratýrasy júrgizgen taldaý barysynda balabaqsha esepshisiniń tórt jyl boiy ózine shtattyq kestede belgilengen jalaqydan joǵary mólsherde qarajat aýdaryp kelgeni anyqtalǵan.
Tekserý málimetinshe, esepshi ózine tiesili bank shottaryna qosymsha aqsha aýdarý arqyly biýdjetke 21,5 mln teńgeden astam shyǵyn keltirgen.
Osy fakti boiynsha aýdan prokýratýrasy Qazaqstan Respýblikasy Qylmystyq kodeksiniń 189-baby 4-bóliginiń 2) tarmaǵynda kózdelgen qylmystyq quqyq buzýshylyq, iaǵni asa iri mólsherde senip tapsyrylǵan bóten múlikti iemdený nemese ysyrap etý faktisi boiynsha sotqa deiingi tergep-tekserýdi bastaǵan.
Qylmystyq is ári qarai tergep-tekserý úshin Qyzylorda oblysy boiynsha Ekonomikalyq tergep-tekserý departamentine joldanady.
Qazirgi ýaqytta sotqa deiingi tergeý júrgizilip jatyr.
