Qazaqstannyń OPEK+ kelisimi aiasyndaǵy munai óndirý kvotasy qyrkúiek aiynda táýligine 1,628 mln barrelge deiin ósedi, dep habarlaidy Dalanews.
OPEK+ elderiniń 2 tamyzda ótken onlain kezdesýiniń qorytyndysy boiynsha 2026 jyldyń qyrkúieginen bastap munai óndirý kólemin táýligine jalpy 188 myń barrelge arttyrý týraly sheshim qabyldandy. Bul – uiymnyń 2023 jyly engizilgen erikti óndiris shekteýlerin kezeń-kezeńimen alyp tastaý josparynyń sońǵy kezeńi.
Qabyldanǵan sheshimge sáikes, Qazaqstannyń munai óndirý kvotasy tamyzdaǵy 1,608 mln barrelden 1,628 mln barrelge deiin ulǵaiady. Óndiris kólemin arttyrýǵa Saýd Arabiiasy, Resei, Irak, Kýveit, Qazaqstan, Aljir jáne Oman qatysady. Jalpy alǵanda bul jeti memleket qyrkúiekten bastap táýligine qosymsha 188 myń barrel munai óndirýge múmkindik alady.
OPEK+ málimdeýinshe, bul sheshim munai naryǵyndaǵy jaǵdaidy turaqtandyrýǵa jáne qatysýshy elderdiń óndiristi óteý jónindegi mindettemelerin oryndaýyna múmkindik beredi. Sonymen birge uiym naryqtaǵy ahýal ózgergen jaǵdaida óndiris kólemin ulǵaitý, ýaqytsha toqtatý nemese qaita qysqartý múmkindigi saqtalatynyn atap ótti.
Sarapshylardyń pikirinshe, kvotalardyń ósýi qazirgi kezeńde munai naryǵyna aitarlyqtai áser etpeýi múmkin. Buǵan Parsy shyǵanaǵyndaǵy tasymaldyń buzylýy, Iran men Ýkraina tóńiregindegi geosaiasi táýekelder, sondai-aq eksport baǵyttaryndaǵy qiyndyqtar sebep bolyp otyr. Sonyń saldarynan OPEK+ biylǵy birneshe aida bekitken óndiris ósimi kóbine qaǵaz júzinde qalyp otyr.
Sonymen qatar OPEK+ ázirge 2026 jyldyń tórtinshi toqsanyna arnalǵan óndiris josparyn jariialaǵan joq. Sarapshylar uiym qyrkúiektegi ósimnen keiin óndiris kólemin ýaqytsha ózgerissiz qaldyrýy múmkin ekenin aityp otyr. Kelesi kezdesý 6 qyrkúiekke josparlanǵan.
