Qarjylyq monitoring agenttigi Bas kólik prokýratýrasynyń úilestirýimen AI-92 markaly benzindi Qyrǵyz Respýblikasyna zańsyz shyǵarýmen ainalysqan qylmystyq topqa qatysty tergep-tekserýdi aiaqtady, dep habarlaidy dalanews.kz.
Top quramynda 9 adam bolǵan. Zańsyz shemany júzege asyrý úshin olar munai ónimderin satyp alý, qujat rásimdeý jáne eksporttaý maqsatynda 12 zańdy tulǵany tirkegen. Benzinniń shyǵý tegin zańdastyrý jáne ony shetelge shyǵarý úshin kúdiktiler "Qara Mai OiL" JShS men Petro Bazis JShS shaǵyn munai óńdeý zaýyttaryn paidalanǵan. Qujat júzinde kásiporyndar AI-92 benzinin jeńil distilliatpen nemese eritkishpen aralastyrý qyzmetin kórsetken. Alaida is júzinde olardyń qyzmeti benzindi eshqandai tehnologiialyq óńdeýsiz temirjol tsisternalaryna quiýmen ǵana shektelgen.
Keiin jalǵan qujattar rásimdelip, olardyń negizinde benzin aromatty kómirsýtekter qospasy, eritkishter nemese jeńil kómirsýtekter qospasy retinde deklaratsiialanǵan. Nátijesinde kólik benzini munai-himiia ónimi retinde kórsetilip, Qyrǵyz Respýblikasyna zańsyz shyǵarylǵan. Bul áreketter eldiń ishki naryǵynda munai ónimderi tapshylyǵy baiqalǵan kezeńde de júzege asyrylǵan.
Zańsyz eksporttalǵan benzin kólemi 190 myń tonnadan asyp, qylmystyq toptyń kóleńkeli ainalymy 37,2 mlrd teńgeden asqan. Jedel izdestirý is-sharalary barysynda "Túrksib" stantsiiasynda Qyrǵyz Respýblikasyna jóneltilmek bolǵan shamamen 500 tonna zańsyz benzin tielgen 8 temirjol tsisternasy ustaldy. Quny 138 mln teńge bolatyn tárkilengen benzin memleket kirisine ótkizildi. Qylmystyq is sotqa joldandy.
