Qyrǵyzstan biligi VI Dúniejúzilik kóshpendiler oiyndarynyń qorytyndysy boiynsha Qazaqstan quramasynyń jalpykomandalyq eseptegi jeńisin resmi túrde moiyndady. Bul týraly Qyrǵyzstan prezidentiniń baspasóz hatshysy Askat Alagózov málimdedi, dep habarlaidy dalanews.kz.
Onyń aitýynsha, VI Dúniejúzilik kóshpendiler oiyndary joǵary deńgeide uiymdastyrylyp, úlken sport merekesi retinde aiaqtalǵan.
Askat Alagózov ásirese kókbóri men jorgo ýlak (jer-ýlak) jarystarynyń tartysty ótkenin atap ótti. Onyń sózinshe, Qazaqstan men Qyrǵyzstan quramalary joǵary deńgeidegi oiyn kórsetip, sporttaǵy básekelestik tek jarys alańynda ǵana qalatynyn taǵy bir márte dáleldegen.
Sondai-aq ol jankúierler arasynda da eshqandai kelispeýshilik bolmaǵanyn aityp, eki eldiń sportshylary men jankúierlerine alǵys bildirdi.
Baspasóz hatshysynyń málimetinshe, jalpykomandalyq esepti shyǵarý kezinde medaldardy sanaýda tehnikalyq sáikessizdik týyndaǵan. Keiin uiymdastyrý komiteti Qazaqstannyń úsh sportshysynyń medaldaryn jeke-jeke esepke alý týraly sheshim qabyldaǵan.
«Osylaisha, jalpykomandalyq esepte birinshi oryndy Qazaqstan ielendi. Qazaq baýyrlarymyzdy jeńisterimen quttyqtaimyz!» – dedi Alagózov.
Ol sondai-aq Qyrǵyzstan sportshylarynyń da jarysta laiyqty óner kórsetip, ózderiniń kúsh-jigeri men sheberligin tanytqanyn atap ótti.
Qyrǵyzstan prezidentiniń baspasóz hatshysy medal kestesi sporttyń bir ǵana bóligi ekenin aityp, Kóshpendiler oiyndarynyń basty jetistigi ózara qurmet pen adal básekelestik rýhynda ótkeninde ekenin jetkizdi.
