Qazaqstan Respýblikasy Kýrýltaiynyń 145 depýtaty Ortalyq sailaý komissiiasynda tirkelip, olardyń depýtattyq ókilettigi resmi túrde bastaldy, dep habarlaidy dalanews.kz.
Búgin Ortalyq sailaý komissiiasynyń XVI otyrysy ótip, onda Kýrýltaidyń jańadan sailanǵan depýtattary tirkeldi. Otyrysta barlyq sailanǵan depýtat qatysty.
OSK tóraǵasy Nurlan Ábdirov Qazaqstan Respýblikasynyń «Kýrýltai jáne onyń depýtattarynyń mártebesi týraly» Konstitýtsiialyq zańyndaǵy talapqa sáikes depýtattyń ókilettigi Ortalyq sailaý komissiiasynda depýtat retinde tirkelgen sátten bastalatynyn atap ótti.
OSK tóraǵasynyń orynbasary Muhtar Ermannyń aitýynsha, komissiia 145 sailanǵan depýtatty tirkeý týraly qaýlylardyń jobalaryn ázirlegen. Olardyń barlyǵy bes saiasi partiiadan sailandy.
Atap aitqanda, «Ádilet» partiiasynan – 110, «Aýyl» partiiasynan – 10, Respublica partiiasynan – 9, «Aq jol» demokratiialyq partiiasynan – 8 jáne Jalpyulttyq sotsial-demokratiialyq partiiadan – 8 depýtat tirkeldi.
«Sizderdiń ókilettikterińiz Ortalyq sailaý komissiiasynda tirkelgen sátten bastaldy. Endi sizder – Qazaqstan Respýblikasynyń zań shyǵarýshy bilikti júzege asyratyn joǵary ókildi organy Kýrýltaidyń depýtattarysyzdar. Kýrýltai depýtattary tóte sailaý quqyǵy negizinde sailandy. Sailaý naýqanynyń barlyq kezeńi zań talaptaryna qatań sáikes uiymdastyryldy. Depýtattyq mandat – halyqtyń senimi men tańdaýynyń nátijesi. Al Kýrýltai depýtatynyń mártebesi árqaisyńyzǵa el men halyq aldynda úlken jaýapkershilik júkteidi», – dedi Nurlan Ábdirov.
Osylaisha, OSK-da tirkelgen 145 depýtattyń Kýrýltaidaǵy ókilettigi resmi túrde kúshine endi.
Otyrystyń sońynda Ortalyq sailaý komissiiasynyń tóraǵasy Kýrýltai depýtattaryna depýtattyq kýálikteri men tósbelgilerin tabystady.
