16 maýsym kúni el tarihynda tuńǵysh ret ult ordasy – Ulytaýda eldiń eleýli azamattarynyń basyn qosqan Ulttyq quryltai ótkeni belgili. Osy oraida Keńes tóraǵasy, Májilis depýtaty Amanjol Áltai quryltaidyń maqsaty men mindetine toqtaldy.
– Quryltai – ata-babamyzdan kele jatqan asa mańyzdy sheshim qabyldaityn ulyq jiyn. Ol – dala demokratiiasynyń jarqyn kórinisi. Biz ata-baba amanatyn arqalap, jolyn jalǵap, kóne dástúrdi jańǵyrttyq. Arada ǵasyrlar ótse de, maqsatymyz ortaq – birlikti bekem etip, alqaly jiynda ultymyzdyń bolashaǵyn aiqyndaityn sheshimder qabyldaý, – dedi ol.
Óz kezeginde «Egemen Qazaqstan» AQ Basqarmasynyń tóraǵasy, «AMANAT» partiiasy Saiasi biýrosynyń múshesi Darhan Qydyráli quryltaidy ashyq qoǵamnyń taǵy bir kórinisi dep baǵalap, onyń ózge keńesý alańdarynan aiyrmashylyǵyn keńinen tarqatyp aitty.
– Jańa Qazaqstannyń mindeti – ashyq azamattyq qoǵam qurý, ádiletti memleket ornatý, demokratiialyq úderisterdi júrgizý. Al quryltai ashyq azamattyq qoǵamdy damytýǵa úlken úles qosady. Mundaǵy aitylǵan pikirlerdiń barlyǵy eldiń muń-muqtajyn, halyqtyń tilegin jetkizýi tiis. Quryltai – bul halyqtyq qurylym. Sondyqtan ony ashyq qoǵamnyń taǵy bir kórinisi dep aitýǵa bolady. Bizde Parlament, Májilis, Senat, Assambleia jáne basqa da minberler bar. Biraq quryltai halyq ókilderiniń arasynan jinalǵandyqtan, halyqtyń sózin aitatyn biik minber bolady dep senemiz, – dedi Darhan Qydyráli.
Ulttyq quryltaidyń quramynda etnolog, geograf, filosof, jaratylystanýshylar bolýy kerek dep esepteidi filologiia ǵylymdarynyń doktory, professor Serik Negimov.
– Ulytaýda ótken quryltaiǵa halyqtyń sózin sóileitin memleket jáne ult qairatkerleri óte jaqsy iriktelip alynǵan. Bolashaqta oryn alady dep boljanyp otyrǵan sý, azyq-túlik tapshylyǵy, jer máselelerin eskere otyryp, endigi quryltaidyń quramyna mamandardy engizý kerek. El tynyshtyǵy, territoriiamyzdyń tutastyǵy, halqymyzdyń ál-aýqaty syndy óte ózekti máselelerdiń sheshilýine quryltai sebepker bolýy tiis, – dedi ǵalym.
Alǵashqy quryltaiǵa 117 adam iriktelip alynǵany belgili. Degenmen, bul tizim aýysyp turady. Belsendi, halyq úshin, eldegi ortaq máselelerdi sheshý úshin úles qosamyn degen kez kelgen qazaqstandyq azamattyń bolashaqta osy keńeske qatysýǵa múmkindigi bar. Bul týraly «Bas redaktorlar klýby» respýblikalyq qoǵamdyq birlestiginiń prezidenti, Ulttyq quryltai Tóraǵasynyń orynbasary Bibigúl Jeksenbai aitty.
Onyń aitýynsha, qazir «Quryltai» dep atalatyn arnaiy mobildi qosymsha jasalyp jatyr. Ol kúzde iske qosylady. Mobildi qosymsha arqyly kez kelgen azamat óz usynysyn quryltaiǵa joldai alady.
– Quryltaidyń Ulttyq keńesten artyqshylyǵy munda aimaqtardaǵy keńesterdiń ókilderi qatysady. Jergilikti jerlerdegi máseleler de tys qalmaýy úshin arnaiy televiziialyq joba qolǵa alynady. Ol – «Habar» jáne «Qazaqstan» telearnalarynyń uiymdastyrýymen ótetin úlken baǵdarlama. Iaǵni, Ulttyq quryltai máselelerdi jylyna bir ret bolatyn jiynda talqylap qoimai, úzdiksiz jumys isteitin úlken alań bolady, – dedi B.Jeksenbai.
Óz kezeginde «Habar» agenttigi» AQ Basqarma tóraǵasy Berik Ýáli telearnada «Ulttyq quryltai» dep atalatyn arnaiy telemarafon jáne Memleket basshysy aitqan eńbek adamyna qurmetti nasihattaý úshin arnaiy jobalar daiyndalyp jatqanyn jetkizdi.
Súretti túsirgen Áli Ǵalym
