Bıyl Qazaqstanda Qurban aıt meıramy 6-8 maýsym aralyǵynda ótedi. Astanada qurbandyq shalýǵa arnalǵan arnaıy oryndar belgilendi. Bul týraly qalalyq Komýnıkasıalar qyzmetinde ótken brıfıńte Astana qalasynyń Din isteri basqarmasy basshysynyń mindetin atqarýshy Sultanbeıbarys Basyr málim etti,- dep habarlaıdy Dalanews.kz
Qazaqstan musylmandary dinı basqarmasynyń aqparatyna sáıkes, 6 maýsym kúni tańǵy saǵat 6:00-de qalanyń barlyq meshitinde aıt namazy oqylady.
Astanada arnaıy bólingen oryndarda qurbandyq shalý saǵat 8:00-den 18:00-ge deıin júrgiziledi.
Aýdan ákimdikteriniń usynystary boıynsha 2025 jyly qurbandyq shalýǵa arnalǵan kelesi 5 oryn belgilendi:
Baıqońyr aýdany:
- «Jaılaý» bazary – Alash tasjoly, S-313 kóshesi;
- «Big Shanhaı» bazary – Alash tasjoly, 34/6 (Kók bazardyń artynda);
- «Barakat» bazary – A-369 kóshesi, №10 ǵımarat;
- «Sháýshen» sharýa qojalyǵy – Alash tasjoly, 136B.
Almaty aýdany:
- «Et-Han» et sehy – Temirjolshylar turǵyn alaby, Aqjar kóshesi, 20.
Astana ákimdigi Qazaqstan musylmandary dinı basqarmasynyń qalalyq ókildigi jáne tıisti memlekettik organdarmen birlesip daıyndyq jáne uıymdastyrý jumysyn júrgizip jatyr.
Sondaı-aq, Qurban aıt kúnderi qurbandyq shalý jáne ózge de ózekti máseleler boıynsha turǵyndarǵa keńes berý úshin «109» call-ortalyǵy táýlik boıy jumys isteıtin bolady.
Eske salaıyq, buǵan deıin Almaty qalasyndaǵy qurban shalý ruqsat etilgen oryndardyń tizimin usynǵan bolatynbyz.
