Sax Invest qarjy piramidasynyń uiymdastyrýshylary 7 jylǵa bas bostandyǵynan aiyryldy, dep habarlaidy dalanews.kz.
Aqtaýda Sax Invest qarjy piramidasyn qurǵan jáne oǵan basshylyq etken uiymdasqan qylmystyq topqa qatysty sot úkimi shyqty.
Qylmystyq top uiymdastyrýshylary investitsiialyq qor retinde jasyrynyp, azamattarǵa baǵaly qaǵazdarǵa, qarjy quraldaryna jáne basqa da aktivterge investitsiia salýdy usynǵan. Sonymen qatar, Afrika elderindegi almaz óndirý jónindegi halyqaralyq jobaǵa qatysyp jatqanyn málimdegen. 2018-2022 jyldar aralyǵynda qylmystyq shemaǵa Astana, Aqtóbe, Oral jáne Aqtaý qalalarynan myńnan asa salymshy tartylǵan.
Tartylǵan qarajattyń jalpy somasy 9 mlrd teńgeden asty. Tergeý barysynda salynǵan qarajattyń edáýir bóligi kompaniianyń esepshottaryna emes, uiymdastyrýshylardyń jeke shottaryna aýdarylǵany anyqtaldy. Keiin bul qarajat jeke maqsattarǵa, sonyń ishinde qumar oiyndarǵa, páterler satyp alýǵa, jeke turǵyn úi salýǵa jáne ózge de qajettilikke jumsalǵan.
Sot uiymdasqan qylmystyq toptyń segiz múshesin kináli dep tanyp, olardy 6 jyldan 7 jylǵa deiingi merzimge bas bostandyǵynan aiyrý jazasyna kesti.
Memleket kirisine jeke turǵyn úi men tsifrlyq aktivter tárkilendi. Sonymen qatar, azamattyq talaptardy oryndaý máselesi sheshilgenge deiin sottalǵandardyń múlkine salynǵan tyiym saqtalady. Onyń ishinde eki kólik, eki páter jáne jer ýchaskesi bar.
Úkim zańdy kúshine engen joq.
