Atyraý oblysy Jylyoi aýdany Qulsary qalasyndaǵy "Bolashaq" yqsham aýdanynda jańa úilerdiń qabyrǵalary jarylyp jatyr. Bul – byltyr kóktemde sý tasqyny kezinde zardap shekkenderge salynǵan úiler,- dep habarlaidy Dalanews.kz "Azattyq radiosyna" silteme jasap.
Úilerdiń qabyrǵasy jarylǵany týraly turǵyndar 11 naýryzda shaǵymdana bastady. Qulsary turǵyny Zamira Alaqaeva úiiniń qabyrǵasyndaǵy jaryqshany 8 naýryzda baiqaǵan.
"Sol kúni tústen keiin merdiger kompaniiaǵa habarlastym. Olar mamandar keledi degenimen, eshkim kelmedi. Tek 9 naýryz, keshki saǵat 18:00-de ákimdikke ózim baryp shaǵym aitqan soń ǵana keldi", – deidi Alaqaeva.
Byltyrǵy sáýirdegi tasqynda Qulsarydaǵy kópqabatty úidiń birinshi qabatyna sý kirip, jertólesine sý tolǵan. Sonyń saldarynan Zamira Alaqaevanyń páteri kóktep, iistenip, turýǵa jaramsyz bolyp qalǵan. Ákimdik oǵan "Bolashaq" yqsham aýdanynan baspana berip, 2024 jyly kúzde úige kirgen edi.
Ásel Dúsipqalievanyń úiinde de jaryqtar 8 naýryzda paida bolǵan. Ol úii bir kúni qulap, astynda qalamyz ba dep qaýiptenedi. "Kún saiyn bir jaryq paida bolady" deidi Ásel.
Jylyoi aýdany ákiminiń orynbasary Gúlnafiz Aishýaqova qurylys basqarmasy "Bolashaqtaǵy" úilerdiń qabyrǵasy jarylǵanynan habardar ekenin jáne yqsham aýdanda tekserý jumystary júrip jatqanyn habarlady. Al oblystyq qurylys basqarmasynyń basshysy Nurbergen Qusaiynovtyń aitýynsha, jaǵdaidy zertteý úshin arnaiy mamandar jiberilgen.
"Búgin orynbasarymdy jiberip, máselemen tolyq tanysyp shyqty. Qazir merdiger mekemeler de sol jerde. Alty úidiń qabyrǵasynan jaryq baiqaldy. Aldyn ala qorytyndyǵa sáikes, negizgi sebep – qardyń shamadan tys jaýýy jáne septikterdiń tolyp ketýi. Qar sýy tazartylmaǵandyqtan, irgetasqa sińip, úilerdiń shógýine áser etken. Qazirgi ýaqytta tehnikalyq zertteý júrgizilip jatyr. Eger irgetasqa zaqym kelmese, jóndeý jumystaryn júrgizemiz. Bir apta ishinde qorytyndy shyǵaryp, jóndeýdi bastaimyz", – dedi ol 11 naýryzda.
Jaryqtar paida bolǵan úilerdi "Armandastar-Atyraý" (bir úi) "Qazkomservis" (bir úi), "ABC-Limited" (tórt úi) kompaniialary salǵany aityldy.
"Osy úsh kompaniiaǵa qazir óz qarajaty esebinen úilerdi qalypqa keltirý jáne tehnikalyq zertteý júrgizý týraly hat joldap jatyrmyz. Jóndeý qajet bolsa, kepildik merzimi boiynsha júzege asyrý týraly da jazyp otyrmyz", - deidi oblystyq qurylys basqarmasy basshysy Qusaiynov.
Eske salaiyq, Atyraý oblysynyń Qulsary qalasy - byltyr sý tasqyny kezinde qatty zardap shekken óńirlerdiń biri. 5 sáýirde qalany sý basyp, úsh myńǵa jýyq úige zalal keldi. Sý tasqynynan keiin baspanasyz qalǵan turǵyndarǵa ótemaqy tóleý máselesi týyndady. Ákimdik ár sharshy metrge 200-240 myń teńge kóleminde ótemaqy tóleýdi usynsa, turǵyndar bul somany az sanap, 400 myń teńgege deiin kóterýdi talap etti.
Buǵan deiin "Qazaqstan halqyna" qorynyń baspasóz qyzmeti Qulsary qalasynda 80 úidiń qurylysyna 2 mlrd 640 mln teńge bólingenin málimdegen. Munda bir úidi salýǵa 31 mln 975 myń teńge bolatyny aitylǵan.
Tasqynnan keiin "Bolashaq" yqsham aýdanynda 100 úi salyndy. Ár úidiń aýdany – 100 sharshy metr.
