Jelide Ulttyq Olımpıada komıtetine basshylyq qyzmetke Gennadıı Golovkın keledi degen aqparat tarady, - dep habarlaıdy Dalanews.kz.

Bul týraly saıasattanýshy, sarapshy Erbol Edilov telegram arnasynda aıtty.

"Keıbir derekterge súıensek, Gennadıı Golovkın Qazaqstan Respýblıkasynyń Ulttyq Olımpıada komıtetin basqarady dep kútilip otyr", - deıdi Edilov.

Osylaısha Golovkın Qulybaevtyń ornyn basýy múmkin.

Aıta keteıik, buǵan deıin jelide eks-prezıdent Nursultan Nazarbaevtyń kúıeýbalasy Tımýr Qulybaev Ulttyq Olımpıada komıteti tóraǵasy qyzmetinen ketedi degen aqparat taraǵan bolatyn. Bul týraly "Chemodan gossekretov" telegram arnasynda jazylǵan.

Telegram arna málimetinshe, bul Tokıo men Azıada Olımpıadasyndaǵy sátsizdikterge baılanysty.

"Qulybaev sporttan qol úzdi, sondaı-aq, uıymnyń qyzmetin qarjylandyrǵysy kelmedi dep aıyptalyp otyr. Ol tolyqtaı respýblıkalyq búdjetke súıenip aldy", - delingen jazbada.

Sonymen qatar, jazbada Keńes Raqyshev te boks federasıasynyń basshysy qyzmetinen ketetini aıtylǵan bolatyn. Al búgin boljam dál kelip, Raqyshev qyzmetinen ketip, ornyna Shahmurat Mútálip taǵaıyndaldy.