Ekologıa mınıstrligi Tımýr Qulybaevtyń munaı óndirýshi kompanıasyna qorshaǵan ortaǵa zıan tıgizgeni úshin aıyppul saldy. Somasy da az emes — 13 mlrd teńge. Jalpy alǵanda qazaqstandyq 1 022 kompanıa bárin qosqanda 40 mlrd teńgege aıyppul arqalady.
«Bıylǵy birinshi jarty jyldyqta Ekologıa mınıstrligi 489 ekologıalyq tekseris júrgizdi. 1331 ekologıalyq zańnamany buzý faktisi anyqtalyp, 860 nusqama berildi. Osylaısha jalpy kólemi 40,1 mlrd teńgege 1022 ákimshilik aıyppul salyndy» delingen mınıstrliktiń jarty jyldyq esebinde.
Endi kimderdiń kólemdi aıyppul arqalaǵanyna toqtalsaq. Atyraý oblysynda ornalasqan eki munaı kompanıasyna somasy jóninen eń aýqymdy aıyppul salynǵan. Onyń bireýi —Qulybaevqa tıesili. «Kaspıı Munaı» AQ qaldyqtardy kómý shegin buzǵany úshin 13 684 868 730 teńgege ákimshilik aıyppul tóleýge mindetteledi. Al North Caspian Operating Company-diń Atyraý oblysyndaǵy fılıaly kúkirtti gaz jaqqany úshin 12,2 mlrd teńge aıyppul tóleıdi. Mınıstrlik bergen aqparatqa súıensek, búginde túrli kompanıalardan jalpy somasy 13,3 mlrd teńge bolatyn 884 aıyppul óndirilgen.
