ەكولوگيا مينيسترلىگى تيمۋر قۇلىبايەۆتىڭ مۇناي ءوندىرۋشى كومپانياسىنا قورشاعان ورتاعا زيان تيگىزگەنى ءۇشىن ايىپپۇل سالدى. سوماسى دا از ەمەس — 13 ملرد تەڭگە. جالپى العاندا قازاقستاندىق 1 022 كومپانيا ءبارىن قوسقاندا 40 ملرد تەڭگەگە ايىپپۇل ارقالادى.   

«بيىلعى ءبىرىنشى جارتى جىلدىقتا ەكولوگيا مينيسترلىگى 489 ەكولوگيالىق تەكسەرىس جۇرگىزدى. 1331 ەكولوگيالىق زاڭنامانى بۇزۋ فاكتىسى انىقتالىپ، 860 نۇسقاما بەرىلدى. وسىلايشا جالپى كولەمى 40،1 ملرد تەڭگەگە 1022 اكىمشىلىك ايىپپۇل سالىندى» دەلىنگەن مينيسترلىكتىڭ جارتى جىلدىق ەسەبىندە.

ەندى كىمدەردىڭ كولەمدى ايىپپۇل ارقالاعانىنا توقتالساق. اتىراۋ وبلىسىندا ورنالاسقان ەكى مۇناي كومپانياسىنا سوماسى جونىنەن ەڭ اۋقىمدى ايىپپۇل سالىنعان. ونىڭ بىرەۋى —قۇلىبايەۆقا تيەسىلى. «كاسپيي مۇناي» اق قالدىقتاردى كومۋ شەگىن بۇزعانى ءۇشىن 13 684 868 730 تەڭگەگە اكىمشىلىك ايىپپۇل تولەۋگە مىندەتتەلەدى. ال North Caspian Operating Companyء-دىڭ اتىراۋ وبلىسىنداعى فيليالى كۇكىرتتى گاز جاققانى ءۇشىن 12،2 ملرد تەڭگە ايىپپۇل تولەيدى. مينيسترلىك بەرگەن اقپاراتقا سۇيەنسەك، بۇگىندە ءتۇرلى كومپانيالاردان جالپى سوماسى 13،3 ملرد تەڭگە بولاتىن 884 ايىپپۇل وندىرىلگەن.