Qazaqstan baspasóz klýbynda "Elge qaitarý" qoǵamdyq qorynyń direktory Orazaly Erjanov QR Premer-Ministri men ýákiletti organdarǵa jańa úndeý jasady, - dep habarlaidy Dalanews.kz.
Video "GiperBorei" YouTube-arnasynda paida boldy.
Orazaly Erjanov Qulybaevtyń 334 million dollary munaishylardyń máselesin sheshýge berilýi keregin aitty.
"Elge qaitarý" qory máseleniń túp-tórkinin 2011 jyly "QazMunaiGaz" UK-nyń "Aqtaýnefteservis" JShS jarǵylyq kapitalyndaǵy 100 paiyzdyq úlesin satyp alý týraly mámileniń buzylýynan kóredi. Tikelei satyp alýshy "QazMunaiGaz" UK enshiles kásiporny boldy. Mámile quny 334 million dollar.
"Búgin Mańǵystaýdaǵy qazaq azamattarynyń aiazda eńbek talaptarymen turǵanyna búgin 74-shi kún. Olardyń muńyna bizdiń de qabyrǵamyz qaiysady. Sondyqtan biz birinshi jiberip otyrǵan aryzymyz - memleket basshysyna, quqyq qorǵaý organdarynyń basshylaryna. Sebebi bul máseleniń túbi 2011 jyly bolǵan jemqorlyq jaǵdaiynda jatyr dep oilaimyz. Buǵan deiin "AktaýNefteServis" degen kompaniia bolǵan. Ol "QazMunaiGazdyń" enshiles kompaniiasy bolǵan. Bul aqparat kezinde internette shyqty, bári ashyq turǵan aqparat. Iaǵni kompaniiany kezinde Timýr Qulybaev burynǵy iesinen tartyp alyp, sosyn 2011 jyly "AktaýNefteServis" kompaniiasy "QazMunaiGazǵa" 334 million teńgege satylǵan. Artynsha olar bul istiń izin jabamyz dep halyqty jumystan da shyǵardy, ózderi satyp alǵan nárseni jekeshelendirip, ony satyp jiberdi. Sońynda zarlap qalǵany - sol jerde istep júrgen azamattar", - deidi Orazaly Erjanov.
Ol 2017 jyly BTA bank pen "Kazkommertsbankti" qutqarý kerek dep memleketten 2 trillion 600 milliard teńge aqshasy bólingenin aitady.
"Onyń qyzyǵyn kórgen - Nazarbaevtyń qyzy men kúieýbalasynyń menshigindegi bank - Halyq bank. Bular ol operatsiialardy jasaǵannan keiin olardyń bailyǵy 2 milliard dollarǵa ósip shyǵa keldi. Oǵan eshqandai saraptama jasalmaǵan, baǵasy belgilenbei, 2 trillion 600 milliard teńge bólinip ketken. Osynyń bári tekserilsin. Eger aqsha urlansa, bárin jaýapqa tartyp, elge keltirilgen ziian ótelsin dep úndeý jasap otyrmyz", - deidi Erjanov.
