قازاقستان باسپا ءسوز كلۋبىندا "ەلگە قايتارۋ" قوعامدىق قورىنىڭ ديرەكتورى ورازالى ەرجانوۆ ق ر پرەمەر-مينيسترى مەن ۋاكىلەتتى ورگاندارعا جاڭا ۇندەۋ جاسادى، - دەپ حابارلايدى Dalanews.kz.
ۆيدەو "گيپەربورەي" YouTube-ارناسىندا پايدا بولدى.
ورازالى ەرجانوۆ قۇلىبايەۆتىڭ 334 ميلليون دوللارى مۇنايشىلاردىڭ ماسەلەسىن شەشۋگە بەرىلۋى كەرەگىن ايتتى.
"ەلگە قايتارۋ" قورى ماسەلەنىڭ تۇپ-توركىنىن 2011 جىلى "قازمۇنايگاز" ۇك-نىڭ "اقتاۋنەفتەسەرۆيس" ج ش س جارعىلىق كاپيتالىنداعى 100 پايىزدىق ۇلەسىن ساتىپ الۋ تۋرالى مامىلەنىڭ بۇزىلۋىنان كورەدى. تىكەلەي ساتىپ الۋشى "قازمۇنايگاز" ۇك ەنشىلەس كاسىپورنى بولدى. مامىلە قۇنى 334 ميلليون دوللار.
"بۇگىن ماڭعىستاۋداعى قازاق ازاماتتارىنىڭ ايازدا ەڭبەك تالاپتارىمەن تۇرعانىنا بۇگىن 74ء-شى كۇن. ولاردىڭ مۇڭىنا ءبىزدىڭ دە قابىرعامىز قايىسادى. سوندىقتان ءبىز ءبىرىنشى جىبەرىپ وتىرعان ارىزىمىز - مەملەكەت باسشىسىنا، قۇقىق قورعاۋ ورگاندارىنىڭ باسشىلارىنا. سەبەبى بۇل ماسەلەنىڭ ءتۇبى 2011 جىلى بولعان جەمقورلىق جاعدايىندا جاتىر دەپ ويلايمىز. بۇعان دەيىن "اكتاۋنەفتەسەرۆيس" دەگەن كومپانيا بولعان. ول "قازمۇنايگازدىڭ" ەنشىلەس كومپانياسى بولعان. بۇل اقپارات كەزىندە ينتەرنەتتە شىقتى، ءبارى اشىق تۇرعان اقپارات. ياعني كومپانيانى كەزىندە تيمۋر قۇلىبايەۆ بۇرىنعى يەسىنەن تارتىپ الىپ، سوسىن 2011 جىلى "اكتاۋنەفتەسەرۆيس" كومپانياسى "قازمۇنايگازعا" 334 ميلليون تەڭگەگە ساتىلعان. ارتىنشا ولار بۇل ءىستىڭ ءىزىن جابامىز دەپ حالىقتى جۇمىستان دا شىعاردى، وزدەرى ساتىپ العان نارسەنى جەكەشەلەندىرىپ، ونى ساتىپ جىبەردى. سوڭىندا زارلاپ قالعانى - سول جەردە ىستەپ جۇرگەن ازاماتتار"، - دەيدى ورازالى ەرجانوۆ.
ول 2017 جىلى بتا بانك پەن "كازكوممەرسبانكتى" قۇتقارۋ كەرەك دەپ مەملەكەتتەن 2 تريلليون 600 ميلليارد تەڭگە اقشاسى بولىنگەنىن ايتادى.
"ونىڭ قىزىعىن كورگەن - نازاربايەۆتىڭ قىزى مەن كۇيەۋبالاسىنىڭ مەنشىگىندەگى بانك - حالىق بانك. بۇلار ول وپەراسيالاردى جاساعاننان كەيىن ولاردىڭ بايلىعى 2 ميلليارد دوللارعا ءوسىپ شىعا كەلدى. وعان ەشقانداي ساراپتاما جاسالماعان، باعاسى بەلگىلەنبەي، 2 تريلليون 600 ميلليارد تەڭگە ءبولىنىپ كەتكەن. وسىنىڭ ءبارى تەكسەرىلسىن. ەگەر اقشا ۇرلانسا، ءبارىن جاۋاپقا تارتىپ، ەلگە كەلتىرىلگەن زيان وتەلسىن دەپ ۇندەۋ جاساپ وتىرمىز"، - دەيدى ەرجانوۆ.
