Bas prokýratýranyń Aktivterdi qaitarý jónindegi komiteti eks-prezident Nursultan Nazarbaevtyń kúieý balasy Timýr Qulybaevpen memleketke $1 mlrd tóleý týraly kelissóz júrgizilip jatqanyn rastasa da, onyń naqty egjei-tegjeiin jariialamai otyr. Alaida komitet bul tólemniń “zańsyz aktivterge” qatysty ekenin atap ótti, dep habarlaidy Dalanews.kz.
“Zańsyz alynǵan aktivterdi memleketke qaitarý týraly” zańnyń 8-baby 3-tarmaǵyna sáikes, ýákiletti organ men aktivterdi qaitarý jónindegi komissiia músheleri alynǵan málimetterdiń qupiialyǵyn saqtaýǵa mindetti. Komissiianyń sheshimi boiynsha júrgizilip jatqan jumystar týraly tolyq aqparat shekteýli taralymdaǵy málimetter qataryna jatqyzyldy”, – dep jaýap berdi komitet KazTAG redaktsiiasynyń Qulybaevpen júrgizilip jatqan kelissózderge qatysty suranysyna.
Aita keteiik, Bloomberg agenttigi Timýr Qulybaevtyń Nazarbaev biligi kezinde jinaǵan bailyǵynyń shyǵý tegine qatysty tergeý aiasynda Qazaqstan biligimen $1 mlrd tóleý týraly kelissóz júrgizip jatqanyn málimdegen edi. Basylymnyń habarlaýynsha, eger kelisim jasalsa, Qulybaev kinásin moiyndamaidy, al tólemder investitsiialar túrinde de júzege asyrylýy múmkin. Sondai-aq bul mámile Qazaqstannyń investorlar senimin qaitarýyna septigin tigizýi múmkin ekeni aitylǵan.
Eske salaiyq, buǵan deiin Timýr Qulybaevqa tiesili dep sanalatyn “TEK-Kazahstan” kompaniiasy memleket menshigine 54 nysandy ótkizdi. Bul týraly bas kólik prokýratýrasy habarlaǵan bolatyn.
Usynylǵan aqparatqa sáikes, quramyna janarmai qoimalary, ǵimarattar men qurylystar, sondai-aq negizgi qural-jabdyq toptary kiretin múlik endi memleketke tiesili. Sonymen birge “Qorǵas” halyqaralyq ortalyǵyndaǵy bagaj terminaly men jer ýchaskesi de qaitarylǵan.
Buǵan deiin Aaktivterdi qaitarý jónindegi komitet Timýr Qulybaevpen sottasyp jatqany týraly aqparat taraǵan edi. Atalǵan kásipkerdiń esimi eldegi eń yqpaldy biznes ókilderiniń biri retinde jii atalady. Ol «Kipros» pen «Joint Technologies» arqyly «TEK-Kazahstan»-dy qadaǵalaǵan dep aitylady.
Qarjy esebine súiensek, Qulybaevtyń Joint Resources holdingi 2023 jyldyń qorytyndysynda 39,1 mlrd teńge taza tabys tapqan. Bul kompaniia negizinen aktivterdi basqarýmen ainalysady. Holdingtiń qaramaǵynda jeti enshiles mekeme bar, olardyń arasynda «Kristall Menedjment» AQ, «Kazakhstan’s mineral resource investment company» JShS, «Shubarkól Premiým» AQ sekildi kásiporyndar jáne basqa da uiymdar kezdesedi.
Memleketke qaitarylǵan 54 nysannyń naqty qandai maqsatta paidalanylatyny áli belgisiz. Degenmen, sarapshylar mundai qadam elimizde aktivterdi zańǵa sáikes retteý jáne menshik qatynastarynyń ashyqtyǵyn arttyrý baǵytynda jasalyp jatqanyn aitady. Quzyrly organdar bul protsestiń jalǵasatynyn, al qajetti jaǵdaida sot sheshimine júginetinin eskertýde.
