باس پروكۋراتۋرانىڭ اكتيۆتەردى قايتارۋ جونىندەگى كوميتەتى ەكس-پرەزيدەنت نۇرسۇلتان نازاربايەۆتىڭ كۇيەۋ بالاسى تيمۋر قۇلىبايەۆپەن مەملەكەتكە $1 ملرد تولەۋ تۋرالى كەلىسسوز جۇرگىزىلىپ جاتقانىن راستاسا دا، ونىڭ ناقتى ەگجەي-تەگجەيىن جاريالاماي وتىر. الايدا كوميتەت بۇل تولەمنىڭ “زاڭسىز اكتيۆتەرگە” قاتىستى ەكەنىن اتاپ ءوتتى، دەپ حابارلايدى Dalanews.kz.
“زاڭسىز الىنعان اكتيۆتەردى مەملەكەتكە قايتارۋ تۋرالى” زاڭنىڭ 8-بابى 3-تارماعىنا سايكەس، ۋاكىلەتتى ورگان مەن اكتيۆتەردى قايتارۋ جونىندەگى كوميسسيا مۇشەلەرى الىنعان مالىمەتتەردىڭ قۇپيالىعىن ساقتاۋعا مىندەتتى. كوميسسيانىڭ شەشىمى بويىنشا جۇرگىزىلىپ جاتقان جۇمىستار تۋرالى تولىق اقپارات شەكتەۋلى تارالىمداعى مالىمەتتەر قاتارىنا جاتقىزىلدى”، – دەپ جاۋاپ بەردى كوميتەت KazTAG رەداكسياسىنىڭ قۇلىبايەۆپەن جۇرگىزىلىپ جاتقان كەلىسسوزدەرگە قاتىستى سۇرانىسىنا.
ايتا كەتەيىك، Bloomberg اگەنتتىگى تيمۋر قۇلىبايەۆتىڭ نازاربايەۆ بيلىگى كەزىندە جيناعان بايلىعىنىڭ شىعۋ تەگىنە قاتىستى تەرگەۋ اياسىندا قازاقستان بيلىگىمەن $1 ملرد تولەۋ تۋرالى كەلىسسوز جۇرگىزىپ جاتقانىن مالىمدەگەن ەدى. باسىلىمنىڭ حابارلاۋىنشا، ەگەر كەلىسىم جاسالسا، قۇلىبايەۆ كىناسىن مويىندامايدى، ال تولەمدەر ينۆەستيسيالار تۇرىندە دە جۇزەگە اسىرىلۋى مۇمكىن. سونداي-اق بۇل مامىلە قازاقستاننىڭ ينۆەستورلار سەنىمىن قايتارۋىنا سەپتىگىن تيگىزۋى مۇمكىن ەكەنى ايتىلعان.
ەسكە سالايىق، بۇعان دەيىن تيمۋر قۇلىبايەۆقا تيەسىلى دەپ سانالاتىن “تەك-كازاحستان” كومپانياسى مەملەكەت مەنشىگىنە 54 نىساندى وتكىزدى. بۇل تۋرالى باس كولىك پروكۋراتۋراسى حابارلاعان بولاتىن.
ۇسىنىلعان اقپاراتقا سايكەس، قۇرامىنا جانارماي قويمالارى، عيماراتتار مەن قۇرىلىستار، سونداي-اق نەگىزگى قۇرال-جابدىق توپتارى كىرەتىن مۇلىك ەندى مەملەكەتكە تيەسىلى. سونىمەن بىرگە “قورعاس” حالىقارالىق ورتالىعىنداعى باگاج تەرمينالى مەن جەر ۋچاسكەسى دە قايتارىلعان.
بۇعان دەيىن ااكتيۆتەردى قايتارۋ جونىندەگى كوميتەت تيمۋر قۇلىبايەۆپەن سوتتاسىپ جاتقانى تۋرالى اقپارات تاراعان ەدى. اتالعان كاسىپكەردىڭ ەسىمى ەلدەگى ەڭ ىقپالدى بيزنەس وكىلدەرىنىڭ ءبىرى رەتىندە ءجيى اتالادى. ول «كيپروس» پەن «Joint Technologies» ارقىلى «تەك-كازاحستان»-دى قاداعالاعان دەپ ايتىلادى.
قارجى ەسەبىنە سۇيەنسەك، قۇلىبايەۆتىڭ Joint Resources حولدينگى 2023 جىلدىڭ قورىتىندىسىندا 39،1 ملرد تەڭگە تازا تابىس تاپقان. بۇل كومپانيا نەگىزىنەن اكتيۆتەردى باسقارۋمەن اينالىسادى. حولدينگتىڭ قاراماعىندا جەتى ەنشىلەس مەكەمە بار، ولاردىڭ اراسىندا «كريستالل مەنەدجمەنت» اق، «Kazakhstan’s mineral resource investment company» ج ش س، «شۇباركول پرەميۋم» اق سەكىلدى كاسىپورىندار جانە باسقا دا ۇيىمدار كەزدەسەدى.
مەملەكەتكە قايتارىلعان 54 نىساننىڭ ناقتى قانداي ماقساتتا پايدالانىلاتىنى ءالى بەلگىسىز. دەگەنمەن، ساراپشىلار مۇنداي قادام ەلىمىزدە اكتيۆتەردى زاڭعا سايكەس رەتتەۋ جانە مەنشىك قاتىناستارىنىڭ اشىقتىعىن ارتتىرۋ باعىتىندا جاسالىپ جاتقانىن ايتادى. قۇزىرلى ورگاندار بۇل پروسەستىڭ جالعاساتىنىن، ال قاجەتتى جاعدايدا سوت شەشىمىنە جۇگىنەتىنىن ەسكەرتۋدە.
