Almatyda biznesti damytýǵa baǵyttalǵan jańa qarjylai qoldaý baǵdarlamasy usynyldy. Endi kásipkerler kepilge qoiatyn múlki bolmasa da, jeńildetilgen nesie ala alady. Bul bastama shaǵyn jáne orta biznesti jandandyryp, qala ekonomikasyn kúsheitýdi kózdeidi, dep habarlaidy Dalanews.kz.
Baǵdarlama aiasynda nesieler qoljetimdi ári tiimdi sharttarmen beriledi.
Mańyzdy salalarda jumys isteitin kásipkerler úshin jyldyq mólsherleme nebári 6% bolady. Bul sanatqa áleýmettik jobalar, kreativti indýstriia, innovatsiialyq bastamalar jáne indýstriialyq parkterdegi kásiporyndar kiredi. Al basqa shaǵyn jáne orta biznes ókilderi úshin nesie jyldyq mólsherlemesi 9 paiyzben usynylady.
Qarjylandyrý kólemi de naqty belgilengen. Kásipkerler jabdyq satyp alý úshin 5,6 mln teńgege deiin, al ainalym qarajatyna (jalaqy, jaldaý aqysy, taýar alý) 2,1 mln teńgege deiin nesie ala alady. Qaryzdy óteý merzimi - 5 jylǵa deiin.
Baǵdarlamanyń taǵy bir mańyzdy artyqshylyǵy - kepilsiz qysqa merzimdi nesie múmkindigi. Eger kásipke jedel qarjy qajet bolsa, bir jylǵa deiingi merzimge 6,4 mln teńgege deiin nesie 12% mólsherlememen beriledi.
Sonymen qatar investorlarǵa óndiris oryndary men keńseler salý úshin jer telimderin alý protsesi jeńildetiledi. Bul jumystardy arnaiy áleýmettik-kásipkerlik korporatsiia (SPK) arqyly júzege asyrý josparlanǵan.
Qala biliginiń esebinshe, atalǵan qoldaý sharalary biznestiń damýyna serpin berip, aldaǵy bes jylda biýdjetke shamamen 23 mlrd teńge kóleminde salyq túsimin qamtamasyz etedi.
