الماتىدا بيزنەستى دامىتۋعا باعىتتالعان جاڭا قارجىلاي قولداۋ باعدارلاماسى ۇسىنىلدى. ەندى كاسىپكەرلەر كەپىلگە قوياتىن مۇلكى بولماسا دا، جەڭىلدەتىلگەن نەسيە الا الادى. بۇل باستاما شاعىن جانە ورتا بيزنەستى جانداندىرىپ، قالا ەكونوميكاسىن كۇشەيتۋدى كوزدەيدى، دەپ حابارلايدى Dalanews.kz.
باعدارلاما اياسىندا نەسيەلەر قولجەتىمدى ءارى ءتيىمدى شارتتارمەن بەرىلەدى.
ماڭىزدى سالالاردا جۇمىس ىستەيتىن كاسىپكەرلەر ءۇشىن جىلدىق مولشەرلەمە نەبارى 6% بولادى. بۇل ساناتقا الەۋمەتتىك جوبالار، كرەاتيۆتى يندۋستريا، يننوۆاسيالىق باستامالار جانە يندۋستريالىق پاركتەردەگى كاسىپورىندار كىرەدى. ال باسقا شاعىن جانە ورتا بيزنەس وكىلدەرى ءۇشىن نەسيە جىلدىق مولشەرلەمەسى 9 پايىزبەن ۇسىنىلادى.
قارجىلاندىرۋ كولەمى دە ناقتى بەلگىلەنگەن. كاسىپكەرلەر جابدىق ساتىپ الۋ ءۇشىن 5،6 ملن تەڭگەگە دەيىن، ال اينالىم قاراجاتىنا (جالاقى، جالداۋ اقىسى، تاۋار الۋ) 2،1 ملن تەڭگەگە دەيىن نەسيە الا الادى. قارىزدى وتەۋ مەرزىمى - 5 جىلعا دەيىن.
باعدارلامانىڭ تاعى ءبىر ماڭىزدى ارتىقشىلىعى - كەپىلسىز قىسقا مەرزىمدى نەسيە مۇمكىندىگى. ەگەر كاسىپكە جەدەل قارجى قاجەت بولسا، ءبىر جىلعا دەيىنگى مەرزىمگە 6،4 ملن تەڭگەگە دەيىن نەسيە 12% مولشەرلەمەمەن بەرىلەدى.
سونىمەن قاتار ينۆەستورلارعا ءوندىرىس ورىندارى مەن كەڭسەلەر سالۋ ءۇشىن جەر تەلىمدەرىن الۋ پروسەسى جەڭىلدەتىلەدى. بۇل جۇمىستاردى ارنايى الەۋمەتتىك-كاسىپكەرلىك كورپوراسيا (سپك) ارقىلى جۇزەگە اسىرۋ جوسپارلانعان.
قالا بيلىگىنىڭ ەسەبىنشە، اتالعان قولداۋ شارالارى بيزنەستىڭ دامۋىنا سەرپىن بەرىپ، الداعى بەس جىلدا بيۋدجەتكە شامامەن 23 ملرد تەڭگە كولەمىندە سالىق ءتۇسىمىن قامتاماسىز ەتەدى.
