"Qazaqstan temir joly" ulttyq kompaniiasy Astana International Exchange (AIX) birjasy arqyly 1,604 mlrd iýan (shamamen 224 mln dollar) kóleminde qaryz aldy, dep habarlaidy Dalanews.kz.
Bul qarajat 2028 jyldyń 15 jeltoqsanyna deiin qaitarylýy tiis. Kompaniia investorlarǵa jyl saiyn 4,2% syiaqy tóleidi.
Bul qadam QTJ-nyń 2050 jylǵa deiin jalǵasatyn iri qaryz alý baǵdarlamasy aiasynda júzege asyryldy. Baǵdarlamanyń jalpy kólemi 2,246 trln teńgege (shamamen 4,6 mlrd dollar) deiin jetedi.
Alynǵan qarjy jańa temirjol jelilerin salýǵa jáne poiyzdar men vagondardy jańartýǵa baǵyttalmaq.
Aita keteiik, QTJ 2011 jyldan beri aktsiialaryn birjaǵa shyǵarý (IPO) josparyn birneshe ret málimdegenimen, bul jospar áli júzege asqan joq.
Eske salaiyq, QTJ qaryzy kóp kompaniialardyń biri. 2024 jyly Májilis otyrysynda Joǵary aýditorlyq palatanyń tóraǵasy Álihan Smaiylov "Qazaqstan temir joly" AQ-nyń qaryzy shamamen 3 trillion teńgege jetkenin aitty. Ol QTJ-ǵa bankrot qaýpi tónip turǵanyn da ashyq málimdegen edi.
"Sońǵy 4 jylda temirjol salasyn damytýǵa shamamen 2 trln teńge bólingen, onyń ishinde biýdjet qarajaty esebinen 332 mlrd. teńge jumsalǵan. Bul ekonomikanyń júkter men jolaýshylardy tasymaldaý qajettiligin úzdiksiz jáne sapaly qamtamasyz etý úshin jetkiliksiz bolyp shyqty. Saldarynan temirjol jelileri, lokomotivter, vagondar ábden tozǵan. ...Búginde QTJ óz mindettemelerin tolyq tóleýge qabileti joq jáne kredit qaýpiniń "qyzyl" aimaǵynda tur. Onyń boryshy 2024 jyldyń basynda 2,9 trln teńge boldy, ol áli de ósip jatyr. Jalpy boryshtyń 45 paiyzy nemese 1,3 trln teńgesi buryn alynǵan boryshtyq mindettemelerdi qaita qarjylandyrýǵa baǵyttalǵan", - dedi ol.
Sarapshy Oljas Qudaibergenov QTJ-da másele bary ras ekenin, degenmen Smaiylov tóndirgendei qaýip joǵyn aitty.
"QTJ-da problema kóp, biraq bankrot bolýy múmkin emes. Qazir qaita QTJ-nyń jaǵdaiy jaqsaryp kele jatyr. 2023 jyly tabysy 30 paiyzǵa kóbeiip, al taza paidasy 4 ese ósti. QTJ jyl saiyn tólenetin qaryzyn tólep jatyr", - dedi ol.
