Qaiǵyly habarmen ministrlik áleýmettik jelidegi paraqshasynda bólisti:
"Qazaqstan Respýblikasy Oqý-aǵartý ministrliginiń ujymy Qazaqstan Respýblikasy Oqý-aǵartý birinshi vitse-ministri Natalia Jumadildaevanyń mezgilsiz qaitys bolýyna bailanysty onyń týǵan-týystary men jaqyndaryna qaiǵyryp kóńil aitady".
Natalia Vasilevna 1965 jylǵy 29 naýryzda Qaraǵandy oblysy Temirtaý qalasynda dúniege kelgen. Onyń pedagogikalyq joly 1987 jyly Qyzylorda jáne Almaty qalalarynyń mektepterinde bastaýysh synyp muǵalimi qyzmetinen bastaldy. Óziniń talanty men kásibine adaldyǵynyń arqasynda direktordyń orynbasary jáne direktor laýazymdarynda qyzmet atqardy. 2013-2016 jyldary ádisker, qalalyq bilim bólimi basshysynyń orynbasary jáne Jasóspirimder men oqýshylar úiiniń direktory bolyp jumys istedi.
2016 jyly Natalia Vasilevna Qazaqstan halqy Assambleiasynyń atynan Qazaqstan Respýblikasy Parlamenti Májilisiniń VI shaqyrylymynyń depýtaty bolyp sailanyp, Halyqaralyq ister, qorǵanys jáne qaýipsizdik komitetiniń jumysyna belsendi qatysty. Depýtattyq ókilettigi aiaqtalǵannan keiin 2021 jyly bilim berý salasyndaǵy qyzmetin jalǵastyryp, "Nazarbaev Ziiatkerlik mektepteri" DBBU Basqarma tóraǵasynyń keńesshisi, Pedagogikalyq sheberlik ortalyǵynyń bilim berý baǵdarlamalary jáne halyqaralyq yntymaqtastyq jónindegi direktordyń orynbasary, keiin Qazaqstan Respýblikasy Oqý-aǵartý ministrliginiń Mektepke deiingi bilim departamentiniń direktory qyzmetterin atqardy.
2023 jyldyń qyrkúieginde Natalia Jumadildaeva Qazaqstan Respýblikasy Oqý-aǵartý birinshi vitse-ministri bolyp taǵaiyndaldy, ol óz ǵumyrynda eldiń bilim berý júiesin damytýǵa eleýli úles qosty.
"Kóp jylǵy jemisti eńbegi úshin Natalia Vasilevna "Qurmet" ordenimen, "Y.Altynsarin" tósbelgisimen marapattalǵan. Onyń kásibiligi, óz isine adaldyǵy jáne óskeleń urpaqtyń bolashaǵyna degen shynaiy qamqorlyǵy áriptesteri men shákirtteriniń júreginde óshpes iz qaldyrdy. Biz Natalia Vasilevnany árdaiym óz isine adal, meiirimdi, jarqyn jan retinde jadymyzda saqtaimyz. Onyń jarqyn beinesi júregimizde máńgi qalady", delingen Oqý-aǵartý ministrligi ujymynyń kóńil aitý habarlamasynda.
