قايعىلى حابارمەن مينيسترلىك الەۋمەتتىك جەلىدەگى پاراقشاسىندا ءبولىستى:
"قازاقستان رەسپۋبليكاسى وقۋ-اعارتۋ مينيسترلىگىنىڭ ۇجىمى قازاقستان رەسپۋبليكاسى وقۋ-اعارتۋ ءبىرىنشى ۆيسە-مينيسترى ناتاليا جۇمادىلدايەۆانىڭ مەزگىلسىز قايتىس بولۋىنا بايلانىستى ونىڭ تۋعان-تۋىستارى مەن جاقىندارىنا قايعىرىپ كوڭىل ايتادى".
ناتاليا ۆاسيليەۆنا 1965 جىلعى 29 ناۋرىزدا قاراعاندى وبلىسى تەمىرتاۋ قالاسىندا دۇنيەگە كەلگەن. ونىڭ پەداگوگيكالىق جولى 1987 جىلى قىزىلوردا جانە الماتى قالالارىنىڭ مەكتەپتەرىندە باستاۋىش سىنىپ ءمۇعالىمى قىزمەتىنەن باستالدى. ءوزىنىڭ تالانتى مەن كاسىبىنە ادالدىعىنىڭ ارقاسىندا ديرەكتوردىڭ ورىنباسارى جانە ديرەكتور لاۋازىمدارىندا قىزمەت اتقاردى. 2013-2016 جىلدارى ادىسكەر، قالالىق ءبىلىم ءبولىمى باسشىسىنىڭ ورىنباسارى جانە جاسوسپىرىمدەر مەن وقۋشىلار ءۇيىنىڭ ديرەكتورى بولىپ جۇمىس ىستەدى.
2016 جىلى ناتاليا ۆاسيليەۆنا قازاقستان حالقى اسسامبلەياسىنىڭ اتىنان قازاقستان رەسپۋبليكاسى پارلامەنتى ءماجىلىسىنىڭ VI شاقىرىلىمىنىڭ دەپۋتاتى بولىپ سايلانىپ، حالىقارالىق ىستەر، قورعانىس جانە قاۋىپسىزدىك كوميتەتىنىڭ جۇمىسىنا بەلسەندى قاتىستى. دەپۋتاتتىق وكىلەتتىگى اياقتالعاننان كەيىن 2021 جىلى ءبىلىم بەرۋ سالاسىنداعى قىزمەتىن جالعاستىرىپ، "نازاربايەۆ زياتكەرلىك مەكتەپتەرى" دببۇ باسقارما ءتوراعاسىنىڭ كەڭەسشىسى، پەداگوگيكالىق شەبەرلىك ورتالىعىنىڭ ءبىلىم بەرۋ باعدارلامالارى جانە حالىقارالىق ىنتىماقتاستىق جونىندەگى ديرەكتوردىڭ ورىنباسارى، كەيىن قازاقستان رەسپۋبليكاسى وقۋ-اعارتۋ مينيسترلىگىنىڭ مەكتەپكە دەيىنگى ءبىلىم دەپارتامەنتىنىڭ ديرەكتورى قىزمەتتەرىن اتقاردى.
2023 جىلدىڭ قىركۇيەگىندە ناتاليا جۇمادىلدايەۆا قازاقستان رەسپۋبليكاسى وقۋ-اعارتۋ ءبىرىنشى ۆيسە-مينيسترى بولىپ تاعايىندالدى، ول ءوز عۇمىرىندا ەلدىڭ ءبىلىم بەرۋ جۇيەسىن دامىتۋعا ەلەۋلى ۇلەس قوستى.
"كوپ جىلعى جەمىستى ەڭبەگى ءۇشىن ناتاليا ۆاسيليەۆنا "قۇرمەت" وردەنىمەن، "ى.التىنسارين" توسبەلگىسىمەن ماراپاتتالعان. ونىڭ كاسىبيلىگى، ءوز ىسىنە ادالدىعى جانە وسكەلەڭ ۇرپاقتىڭ بولاشاعىنا دەگەن شىنايى قامقورلىعى ارىپتەستەرى مەن شاكىرتتەرىنىڭ جۇرەگىندە وشپەس ءىز قالدىردى. ءبىز ناتاليا ۆاسيليەۆنانى ءاردايىم ءوز ىسىنە ادال، مەيىرىمدى، جارقىن جان رەتىندە جادىمىزدا ساقتايمىز. ونىڭ جارقىن بەينەسى جۇرەگىمىزدە ماڭگى قالادى"، دەلىنگەن وقۋ-اعارتۋ مينيسترلىگى ۇجىمىنىڭ كوڭىل ايتۋ حابارلاماسىندا.
