Abai oblysynyń Aiagóz aýdanynda ornalasqan Qozy Kórpesh – Baian sulý kesenesine aparatyn kópir áli kúnge deiin qalpyna keltirilmedi. Ótken jyly sý tasqyny kezinde qiraǵan ótkel bir jyldan beri jóndeý kórmei, bul másele kún tártibinen túspei tur, dep habarlaidy Dalanews.kz.
Jergilikti turǵyn Oljas Ahmetov áleýmettik jelide biliktiń nazaryn osy problemaǵa aýdarýǵa tyrysty. Onyń aitýynsha, jaz mezgilinde kesenege sheteldik jáne otandyq týrister kóptep aǵylady. Alaida kópirdiń jaramsyz kúide bolýy tarihi orynǵa jetýdi qiyndatyp qana qoimai, Qazaqstannyń týristik imidjine de keri áserin tigizýi múmkin.
“Bul – el tarihy men mádenietiniń bir bóligi. Týristerdiń aldynda uiatqa qalmas úshin kópirdi múmkindiginshe tezirek jóndegen jón”, – dep atap ótti Ahmetov.
Aita keteiik, Qozy Kórpesh – Baian sulý mazary – elimizdegi eń kóne sáýlet eskertkishteriniń biri. Kesene Qazaqstannyń tarihi-mádeni muralarynyń tizimine engizilgen jáne erekshe qorǵaýǵa alynǵan. Ol – halqymyzdyń rýhani qundylyqtarynyń biri ǵana emes, sonymen qatar qazaq jerindegi kóne sáýlet óneriniń biregei úlgisi.
Qazirgi kezde kesene týrister arasynda tanymal oryndardyń biri. Jyl saiyn munda eldiń túkpir-túkpirinen jáne shetelden saiahatshylar keledi. Alaida, sońǵy jyldary oǵan aparatyn kópirdiń qiraýy kesene mańyndaǵy infraqurylymnyń jaǵdaiyn qiyndatyp otyr.
