Qostanai – Áýliekól – Surǵan tasjolynda bolǵan daýly videodadan keiin Lexus kóliginiń iesi Qostanai IIM akademiiasynan shyǵaryldy, dep habarlaidy Dalanews.kz.
“Qyzmettik tekseris nátijesinde Qostanai – Áýliekól tasjolynda jol erejesin buzǵan júrgizýshi akademiianyń magistratýrasynan shyǵarylyp, quqyq qorǵaý organdarynyń bedeline nuqsan keltiretin áreketi úshin ishki ister organdaryndaǵy jumysynan bosatyldy”, – dep málimdedi oqý orny.
Aita keteiik, kúni keshe Qostanai – Áýliekól – Surǵan tasjolynda Lexus kóligin toqtatý oqiǵasyna bailanysty qyzmettik tekseris bastalǵany týraly aqparat tarady. Nátijesinde Lexus júrgizýshisine aiyppul salmaǵan politsiia qyzmetkerleri jumysynan qýyldy.
Ztbnews taratqan aqparatqa sáikes, tártiptik komissiianyń sheshimimen eki inspektor qyzmetinen bosatylǵan.
"Júrgizýshiniń jaýapkershiligi qaralyp jatyr. Ol Qostanai IIM akademiiasynyń magistranty bolǵandyqtan, tergeý nátijesine qarai ony oqýdan shyǵarý máselesi de qarastyrylýy múmkin", — dep málimdedi politsiianyń baspasóz qyzmeti.
Buǵan deiin áleýmettik jelide patrýldik politsiia qyzmetkerleriniń Lexus kóliginiń júrgizýshisin toqtatqan videosy taraǵan bolatyn.
Júrgizýshi kóligin toqtatqan politsiia qyzmetkerine narazy bolyp, oǵan dóreki sóilegen. Ol inspektorǵa "nómirimdi jattap al" dep buiryq berip, qyzmette qansha ýaqyt júrgenin suraidy. Áńgime barysynda júrgizýshi burynǵy jol politsiiasy qyzmetkeri ekenin aityp, 11 jyl boiy GAI-de jumys istegenin jáne jol erejeleriniń barlyq qyr-syryn biletinin jetkizgen.
Qysqa tartystan keiin júrgizýshi kóligine qaita otyryp, ketip qalǵan. Keiin belgili bolǵandai, oǵan eshqandai aiyppul salynbaǵan.
