قوستاناي – اۋليەكول – سۇرعان تاسجولىندا بولعان داۋلى ۆيدەودادان كەيىن Lexus كولىگىنىڭ يەسى قوستاناي ءىىم اكادەمياسىنان شىعارىلدى، دەپ حابارلايدى Dalanews.kz.
“قىزمەتتىك تەكسەرىس ناتيجەسىندە قوستاناي – اۋليەكول تاسجولىندا جول ەرەجەسىن بۇزعان جۇرگىزۋشى اكادەميانىڭ ماگيستراتۋراسىنان شىعارىلىپ، قۇقىق قورعاۋ ورگاندارىنىڭ بەدەلىنە نۇقسان كەلتىرەتىن ارەكەتى ءۇشىن ىشكى ىستەر ورگاندارىنداعى جۇمىسىنان بوساتىلدى”، – دەپ مالىمدەدى وقۋ ورنى.
ايتا كەتەيىك، كۇنى كەشە قوستاناي – اۋليەكول – سۇرعان تاسجولىندا Lexus كولىگىن توقتاتۋ وقيعاسىنا بايلانىستى قىزمەتتىك تەكسەرىس باستالعانى تۋرالى اقپارات تارادى. ناتيجەسىندە Lexus جۇرگىزۋشىسىنە ايىپپۇل سالماعان پوليسيا قىزمەتكەرلەرى جۇمىسىنان قۋىلدى.
Ztbnews تاراتقان اقپاراتقا سايكەس، تارتىپتىك كوميسسيانىڭ شەشىمىمەن ەكى ينسپەكتور قىزمەتىنەن بوساتىلعان.
"جۇرگىزۋشىنىڭ جاۋاپكەرشىلىگى قارالىپ جاتىر. ول قوستاناي ءىىم اكادەمياسىنىڭ ماگيسترانتى بولعاندىقتان، تەرگەۋ ناتيجەسىنە قاراي ونى وقۋدان شىعارۋ ماسەلەسى دە قاراستىرىلۋى مۇمكىن"، — دەپ مالىمدەدى پوليسيانىڭ باسپا ءسوز قىزمەتى.
بۇعان دەيىن الەۋمەتتىك جەلىدە پاترۋلدىك پوليسيا قىزمەتكەرلەرىنىڭ Lexus كولىگىنىڭ جۇرگىزۋشىسىن توقتاتقان ۆيدەوسى تاراعان بولاتىن.
جۇرگىزۋشى كولىگىن توقتاتقان پوليسيا قىزمەتكەرىنە نارازى بولىپ، وعان دورەكى سويلەگەن. ول ينسپەكتورعا "ءنومىرىمدى جاتتاپ ال" دەپ بۇيرىق بەرىپ، قىزمەتتە قانشا ۋاقىت جۇرگەنىن سۇرايدى. اڭگىمە بارىسىندا جۇرگىزۋشى بۇرىنعى جول پوليسياسى قىزمەتكەرى ەكەنىن ايتىپ، 11 جىل بويى گاي-دە جۇمىس ىستەگەنىن جانە جول ەرەجەلەرىنىڭ بارلىق قىر-سىرىن بىلەتىنىن جەتكىزگەن.
قىسقا تارتىستان كەيىن جۇرگىزۋشى كولىگىنە قايتا وتىرىپ، كەتىپ قالعان. كەيىن بەلگىلى بولعانداي، وعان ەشقانداي ايىپپۇل سالىنباعان.
