Qostanai oblysynda «Kitap oqityn ult» jobasyna qatysýshylar sany 55 myńnan asty. Statistikaǵa súiensek, oqyrmandar kóshin mektep oqýshylary bastap tur – qazirgi ýaqytta 30 703 oqýshy tirkelgen. Bul kórsetkish jas urpaqtyń oqý mádenietine qyzyǵýshylyǵynyń artyp kele jatqanyn baiqatady, dep habarlaidy Dalanews.kz.
Eń belsendi aimaq – Qostanai qalasy: qala mektepterinen 6418 oqýshy tirkelgen. Odan keiingi oryndarda Rýdnyi qalasy (4788), Áýliekól aýdany (3112), Qostanai aýdany (2501) jáne Jitiqara aýdany (2195) tur. Basqa qalalar men aýdandardyń oqýshylary da jobaǵa belsendi túrde qosylǵan.
«Kitap oqityn áýlet» baǵyty boiynsha oblysta 10 122 otbasy tirkeldi. Otbasylyq oqý dástúri – urpaqtar sabaqtastyǵynyń jarqyn kórinisi.
«Kitap oqityn pedagog» baǵytynda 11 047 muǵalim qatysýda. Jobaǵa bilim berý uiymdarynyń basshylary da belsendi atsalysyp jatyr: 434 direktor jáne 277 direktor orynbasary kitap oqýǵa niet bildirdi.
«Kitap oqityn kolledj» baǵytynda oblystyń 33 kolledjinen 2028 stýdent tirkelgen.
«Kitap oqityn memlekettik qyzmetshi» baǵytynda 300-den astam adam qatysyp jatyr. Aýdan jáne qala ákimderi apparattarynyń, basqarma qyzmetkerleriniń qatysýy joǵary. Erekshe kózge túskeni – Fedorov aýdany: 12 aýyldyq okrýg ákimi jáne 18 bólim basshysy tirkelgen. Rýdnyi qalasynan – 15, Qarabalyq aýdanynan – 9 aýyl ákimi, Amangeldi aýdanynan – 5, Qarasý aýdanynan – 3 aýyl ákimi jobaǵa qosyldy. Basqarma basshylarynyń orynbasarlary men qala ákiminiń orynbasarlary da qatysýda.
«Kitap oqityn ýniversitet» baǵytynda oblystyń 6 joǵary oqý ornynan 1008 stýdent tirkelgen.
«Bul jobaǵa qatysý men úshin kásibi mindet qana emes, shynaiy qushtarlyq. Oqityn muǵalim – bilimdi muǵalim. Jańa ádistemeler men psihologiialyq-pedagogikalyq eńbekterdi oqi otyryp, sabaq berý sapasyn arttyramyz. Muǵalimniń qolyndaǵy kitap – oqýshylar úshin eń úzdik úlgi ári kúshti motivatsiia. Qazir Orynsha Qarabalinanyń “Ustaz baqyty” kitabyn oqyp jatyrmyn. Bul shyǵarma ustazdyqtyń rýhani jáne praktikalyq qyr-syryn qaita ashqandai áser qaldyrady», - deidi Qostanai qalasyndaǵy №31 mekteptiń bastaýysh synyp muǵalimi Qymbat Sultanova.
Qoǵamdyq damý basqarmasynyń bas mamany Arailym Ismaǵulova kitap oqýdy jeke damýdyń mańyzdy bóligi dep esepteidi.
«Bos ýaqytymnyń kóbin oqýǵa arnaimyn. Qazir Nikkolo Makiavellidiń “Ámirshi” traktatyn oqyp jatyrmyn. Joba aiaqtalǵannan keiin de bul kitaptardyń qundylyǵy joiylmaidy», – deidi ol.
Eske salaiyq, 2025 jyldyń qyrkúieginde «Kitap oqityn ult» jobasy pilottyq túrde Qostanai, Qaraǵandy oblystary men Shymkent qalasynda bastaý alǵan bolatyn. Qazirgi tańda úsh óńirde jobaǵa 189 myńnan astam adam qatysýda, joba qorytyndysy 2026 jylǵy sáýirde shyǵarylady.
