Qostanai oblysy densaýlyq saqtaý basqarmasynyń eks-basshysy men qazirgi orynbasary iri kólemdegi jymqyrý boiynsha ustaldy, dep habarlaidy Dalanews.kz.
Qostanai oblysynyń prokýratýrasy ózge de quqyq qorǵaý jáne ýákiletti organdarmen birlesip meditsinalyq jabdyqtardy satyp alý salasynda jemqorlyq shemasyn anyqtady.
Tergeý deregine sáikes, óńirdegi densaýlyq saqtaý basqarmasynyń ókilderi meditsinalyq jabdyqtardy naryqtyq baǵadan birneshe ese qymbatqa satyp alǵan. Sonyń saldarynan memleketke keltirilgen shyǵyn kólemi 2 mlrd teńgeden asty.
Qylmystyq is aiasynda Qostanai oblysy ákimdiginiń «Densaýlyq saqtaý basqarmasy» memlekettik mekemesiniń burynǵy basshysy, basqarmanyń qazirgi orynbasary, aýdandyq bas dáriger, sondai-aq meditsinalyq jabdyq jetkizýshi ustaldy.
Qazirgi ýaqytta sotqa deiingi tergeý jalǵasyp jatyr. Ózge málimetter tergeý múddesine bailanysty jariia etilmeidi.
