Qostanai oblysy Áýliekól aýdanyna qarasty Novonejinka aýylynda turǵyndar balalaryn jańa oqý jylynda mektepke jiberýge kúmánmen qarap otyr. Sebebi byltyr oqý ornynyń kúrdeli jóndeýi kezinde ekinshi qabattyń qabyrǵasy men aralyq taqtalary qulap túsken. Abyroi bolǵanda, ol kezde eshkim zardap shekpegen. Alaida biylǵy qalpyna keltirý jumystaryna qaramastan, ata-analar men merdiger kompaniia ǵimarattyń áli de apatty jaǵdaida ekenin alǵa tartýda,- dep habarlaidy Dalanews.kz "Informbiýro" baǵdarlamasyna silteme jasap.
Mektepti qaita qalpyna keltirýge birneshe kompaniia jumyldyrylǵan. Alaida bas merdiger – "Grenada" JShS nysannyń tehnikalyq jaǵdaiyna kúmán keltirip, kelisimshartty sot arqyly buzýǵa nietti. Kompaniia basshysy Anatolii Gromchenkonyń aitýynsha, úshinshi qabattaǵy sylaqtyń túsýi arajabyn taqtalarynyń qozǵalǵanyn bildirýi múmkin.
"Biz bul jaǵdaidyń qaýipsiz emes ekenin tapsyrys berýshige eskerttik", – deidi ol.
Al jergilikti ákimdik mekteptiń oqý jylyna 72 paiyz daiyn ekenin aityp, qaita jóndeý jumystarynyń jalǵasýyn suraǵan. Áýliekól aýdandyq bilim bóliminiń basshysy Dosbol Qusaiynovtyń aitýynsha, táýelsiz saraptama júrgizgen "Promtehekspert" mekemesi ǵimarattyń apatty jaǵdaida emestigin rastaǵan.
Degenmen ata-analar bul qorytyndyǵa senbei otyr. Olar oqý protsesi bastalmai turyp táýelsiz saraptama júrgizilmese, balalaryn mektepke jibermeitinderin aitýda.
"Qazirdiń ózinde qabyrǵalar maiysyp tur. Balalar oinap, sekirgen kezde ne bolatynyn elestetýdiń ózi qorqynyshty", – deidi aýyl turǵyny Maira Belender.
Aýyl mektebin jóndeýge 900 million teńge jumsalǵan. Turǵyndar bul qarajatqa jańa, qaýipsiz mektep salýǵa bolar edi degen pikirde.
Qazir jaǵdaidy sheshý úshin jergilikti bilik pen ata-analar arasynda dialog ornatý qajet. Al mekteptiń jańa oqý jylyna daiyn bolýy – bilim sapasy ǵana emes, eń aldymen balalardyń qaýipsizdigi úshin mańyzdy.
