قوستاناي وبلىسى اۋليەكول اۋدانىنا قاراستى نوۆونەجينكا اۋىلىندا تۇرعىندار بالالارىن جاڭا وقۋ جىلىندا مەكتەپكە جىبەرۋگە كۇمانمەن قاراپ وتىر. سەبەبى بىلتىر وقۋ ورنىنىڭ كۇردەلى جوندەۋى كەزىندە ەكىنشى قاباتتىڭ قابىرعاسى مەن ارالىق تاقتالارى قۇلاپ تۇسكەن. ابىروي بولعاندا، ول كەزدە ەشكىم زارداپ شەكپەگەن. الايدا بيىلعى قالپىنا كەلتىرۋ جۇمىستارىنا قاراماستان، اتا-انالار مەن مەردىگەر كومپانيا عيماراتتىڭ ءالى دە اپاتتى جاعدايدا ەكەنىن العا تارتۋدا،- دەپ حابارلايدى Dalanews.kz "ينفورمبيۋرو" باعدارلاماسىنا سىلتەمە جاساپ.
مەكتەپتى قايتا قالپىنا كەلتىرۋگە بىرنەشە كومپانيا جۇمىلدىرىلعان. الايدا باس مەردىگەر – "گرەنادا" ج ش س نىساننىڭ تەحنيكالىق جاعدايىنا كۇمان كەلتىرىپ، كەلىسىمشارتتى سوت ارقىلى بۇزۋعا نيەتتى. كومپانيا باسشىسى اناتوليي گرومچەنكونىڭ ايتۋىنشا، ءۇشىنشى قاباتتاعى سىلاقتىڭ ءتۇسۋى اراجابىن تاقتالارىنىڭ قوزعالعانىن ءبىلدىرۋى مۇمكىن.
"ءبىز بۇل جاعدايدىڭ ءقاۋىپسىز ەمەس ەكەنىن تاپسىرىس بەرۋشىگە ەسكەرتتىك"، – دەيدى ول.
ال جەرگىلىكتى اكىمدىك مەكتەپتىڭ وقۋ جىلىنا 72 پايىز دايىن ەكەنىن ايتىپ، قايتا جوندەۋ جۇمىستارىنىڭ جالعاسۋىن سۇراعان. اۋليەكول اۋداندىق ءبىلىم ءبولىمىنىڭ باسشىسى دوسبول قۇسايىنوۆتىڭ ايتۋىنشا، تاۋەلسىز ساراپتاما جۇرگىزگەن "پرومتەحەكسپەرت" مەكەمەسى عيماراتتىڭ اپاتتى جاعدايدا ەمەستىگىن راستاعان.
دەگەنمەن اتا-انالار بۇل قورىتىندىعا سەنبەي وتىر. ولار وقۋ پروسەسى باستالماي تۇرىپ تاۋەلسىز ساراپتاما جۇرگىزىلمەسە، بالالارىن مەكتەپكە جىبەرمەيتىندەرىن ايتۋدا.
"ءقازىردىڭ وزىندە قابىرعالار مايىسىپ تۇر. بالالار ويناپ، سەكىرگەن كەزدە نە بولاتىنىن ەلەستەتۋدىڭ ءوزى قورقىنىشتى"، – دەيدى اۋىل تۇرعىنى مايرا بەلەندەر.
اۋىل مەكتەبىن جوندەۋگە 900 ميلليون تەڭگە جۇمسالعان. تۇرعىندار بۇل قاراجاتقا جاڭا، ءقاۋىپسىز مەكتەپ سالۋعا بولار ەدى دەگەن پىكىردە.
ءقازىر جاعدايدى شەشۋ ءۇشىن جەرگىلىكتى بيلىك پەن اتا-انالار اراسىندا ديالوگ ورناتۋ قاجەت. ال مەكتەپتىڭ جاڭا وقۋ جىلىنا دايىن بولۋى – ءبىلىم ساپاسى عانا ەمەس، ەڭ الدىمەن بالالاردىڭ قاۋىپسىزدىگى ءۇشىن ماڭىزدى.
