Qostanai oblysynyń Áýliekól aýdandyq soty bloger Nikolai Giniatovty aiyptady. Ol ákim orynbasary Gúlbara Musaǵazinaǵa qatysty jalǵan aqparat taratqany úshin 200 MRP (784 myń teńge) mólsherinde aiyppul arqalady, dep habarlaidy Dalanews.kz.
Halyqstan telegram arnasynyń málimetinshe, Musaǵazina Giniatovtyń birqatar jariialanymynda onyń abyroiy men ar-namysyna nuqsan keltiretin, jalǵan aqparat taratylǵanyn dáleldep, sotqa júgindi. Bloger Musagǵzina atalǵan aqparatpen bailanysy bar dep, Qostanai oblysynyń densaýlyq saqtaý júiesindegi sybailas jemqorlyqqa qatysty pikirlerin bildirgen. Ol meditsinalyq jabdyq satyp alýda qarjynyń tiimsiz paidalanylǵanyn, sondai-aq basqa da quqyqtyq jáne qarjylyq buzýshylyqtardy Musaǵazina bile tura jasaǵan dep málimdegen edi.
Sotqa usynylǵan zertteý nátijeleri boiynsha jariialanǵan materialdardyń kópshiligi Musaǵazinanyń aryzyndaǵy talaptardy rastaidy. Al Giniatov óz kezeginde taralǵan aqparattyń jalǵan ekenin dáleldeitin faktiler anyqtalmaǵanyn aityp, óz kinásin joqqa shyǵardy. Bloger sondai-aq aqparatty tekserý nemese rastaý múmkindigi bolmaǵanyn alǵa tartqan.
Degenmen sot materialy boiynsha Musaǵazinanyń ar-namysy men abyroiyn tómendetetin belgiler anyqtalǵan.
Osylaisha, Áýliekól aýdandyq soty Nikolai Giniatovty mass-media arqyly jalǵan aqparat taratqany úshin kináli dep tanyp, oǵan aiyppul saldy.
