Memleket basshysy Qasym-Jomart Toqaevtyń jáne «AMANAT» partiiasynyń sailaýaldy baǵdarlamasynda jastardy qoldaý máselesine basa mán berilgen. Onda 2029 jylǵa deiin 2,3 million jasty jumysqa ornalastyrý mindeti qoiyldy.
Osy oraida, partiianyń «Jastar Rýhy» jastar qanaty «Jastarǵa jumys» jobasyn júzege asyryp otyr. Jobanyń negizgi baǵyttarynyń biri – bos jumys oryndary jármeńkesin ótkizý. Jármeńke 10-20 shilde aralyǵynda elimizdiń barlyq óńirinde uiymdastyrylady.
Erlan Qoshanov elordadaǵy bos jumys oryndary jármeńkesine qatysyp, jastarmen jáne áleýetti jumys berýshilermen áńgimelesti.
– Búginde jastar qaýymyn tolǵandyratyn negizgi máseleniń biri – jumysqa ornalasý. Jastardyń qalaýy men áleýetine sai keletin laiyqty jumys tabý óte mańyzdy. Bul olardyń óz qabilet-qarymyn shyńdaýdyń, otbasy men eldiń igiligi úshin adal eńbek etýiniń alǵysharty. «Jastarǵa jumys» jobasy, mine osyǵan baǵyttalǵan. Bul bastama jastardyń jumys tabýyn qoljetimdi, ashyq ári yńǵaily etedi, – dedi partiia tóraǵasy.
Erlan Qoshanov partiia janyndaǵy jastar qanatynyń basty maqsaty – memleket usynatyn múmkindikterdi qalai paidalanýǵa bolatynyn jastarǵa túsinikti tilde saýatty ári jan-jaqty túsindirý ekenin atap ótti.
«Jastarǵa jumys» bos jumys oryndary jármeńkesi bir tereze qaǵidaty boiynsha jumys isteidi. Onda izdenýshi bos jumys oryndarynyń bar-joǵyn bilip qana qoimai, sol jerde qajetti málimet alyp, jumys jaǵdaiyn naqtylai alady. Jármeńkede jumysqa ornalastyrýdan bólek, jastardy áleýmettik qoldaýǵa qatysty memlekettik barlyq baǵdarlama boiynsha keńes beriledi. Iaǵni, baspana alýdan bastap, emdelýge, jeke kásip bastaýǵa jáne bilim alýǵa qatysty baǵyt-baǵdar usynylady.
Joba aiasynda jyldyq mólsherlemesi 2,5%-dy quraityn nesielendirý, taý-ken ónerkásibinde 2 myń bos jumys ornyn qurý, jas mamandardy IT-daǵdysyna úiretý úshin 3 myń vaýcher bólý jáne taǵy basqa bastamalar qarastyrylǵan.
«Jastarǵa jumys» jobasy 2023 jyldyń qańtarynda bastaý aldy. Jarty jylda el aýmaǵynda 120-dan astam bos jumys oryndar jármeńkesi uiymdastyrylyp, oǵan 90 myńnan astam adam qatysty. Onyń ishinde, 18,6 myń jas jumysqa ornalasýǵa joldama alyp úlgerdi. Elimizdegi 3000-nan astam iri jáne shaǵyn kásiporyndarmen jastardy jumysqa ornalastyrý jóninde ýaǵdalastyqqa qol jetkizildi.
Eske sala keteiik, buǵan deiin «AMANAT» partiiasy Eńbek jáne halyqty áleýmettik qorǵaý ministrligimen birge jastardy nátijeli jumyspen qamtýǵa baǵyttalǵan «Jastarǵa jumys» jobasyn júzege asyrý boiynsha birlesken is-qimyl josparyn ázirlegen edi.
Sýretti túsirgen Áli Ǵalym
