– Naqty bir adamǵa – Nazarbaevqa qarsy saiasi narazylyq aktsiialary 11 oblys ortalyǵynda, 70 shaǵyn qalada, eldimekenderde ótti. Nazarbaev elde munsha qarsylyqty elektorat bar dep kútpedi. 2 qańtarda munaishylar naryzylyq bastady, 3 qańtarda bul saiasi narazylyqqa ulasty. Menińshe, Nazarbaev óziniń otbasyna degen eldiń jekkórýshiligin de kútpedi...
Qarsylyqty elektorat – bir jarym million adam Qosanovqa daýys berdi. Sosyn Qosanovty jurt nege jek kórip ketti? Elektorattyń deni Qosanovqa prezidenttikti báribir bermeitinin óte jaqsy bildi.
Biraq odan 9-10 maýsymda sailaý qorytyndysyn moiyndamai, jurtty alańǵa shaqyrady dep kútti. Bul dúrbeleń 2019 jyldyń jazynda bolýy tiis edi.
Ol kezde júzdegen myń adam emes, bir jarym million adam alańǵa shyǵar edi. Qarsylyqty elektorattyń deńgeii postkeńestik keńistikte – Reseide de, Qazaqstanda da, Belarýste de óte joǵary.
Keńes odaǵy taraǵanyna 30 jyldan asty. Qubyjyqtai kórinetin áleýmettik teńsizdigi, jumyssyzdyǵy, basqa da «erkelikteri» bar memlekettik-oligarhtyq kapitalizmdi qabyldai almaityn jańa býyn ósip shyqty. Basty sebep – osyda...
Nazarbaev 2011 jyly bir dollar 125 teńge bolǵan kezde ornynan ketkende qazir ol «Uly saiasi qairatker» retinde este qalar edi. Biraq onyń aqyry keremet saiasi mánsabyn shaiyp ketti. Sońǵy on jylda Nazarbaevqa saiasat kerek emes edi. 2011 jáne 2015 jyldary ótken ish pystyratyn saiasi naýqan, úsh birdei devalvatsiia tóbeden jai túskendei áser etti. Halyqtyń ulttyq valiýtaǵa degen senimi joiyldy. Al ulttyq valiýta – memlekettiń mańyzdy atribýty.
