– ناقتى ءبىر ادامعا – نازاربايەۆقا قارسى ساياسي نارازىلىق اكسيالارى 11 وبلىس ورتالىعىندا، 70 شاعىن قالادا، ەلدىمەكەندەردە ءوتتى. نازاربايەۆ ەلدە مۇنشا قارسىلىقتى ەلەكتورات بار دەپ كۇتپەدى. 2 قاڭتاردا مۇنايشىلار نارىزىلىق باستادى، 3 قاڭتاردا بۇل ساياسي نارازىلىققا ۇلاستى. مەنىڭشە، نازاربايەۆ ءوزىنىڭ وتباسىنا دەگەن ەلدىڭ جەككورۋشىلىگىن دە كۇتپەدى...
قارسىلىقتى ەلەكتورات – ءبىر جارىم ميلليون ادام قوسانوۆقا داۋىس بەردى. سوسىن قوسانوۆتى جۇرت نەگە جەك كورىپ كەتتى؟ ەلەكتوراتتىڭ دەنى قوسانوۆقا پرەزيدەنتتىكتى ءبارىبىر بەرمەيتىنىن وتە جاقسى ءبىلدى.
ءبىراق ودان 9-10 ماۋسىمدا سايلاۋ قورىتىندىسىن مويىنداماي، جۇرتتى الاڭعا شاقىرادى دەپ كۇتتى. بۇل دۇربەلەڭ 2019 جىلدىڭ جازىندا بولۋى ءتيىس ەدى.
ول كەزدە جۇزدەگەن مىڭ ادام ەمەس، ءبىر جارىم ميلليون ادام الاڭعا شىعار ەدى. قارسىلىقتى ەلەكتوراتتىڭ دەڭگەيى پوستكەڭەستىك كەڭىستىكتە – رەسەيدە دە، قازاقستاندا دا، بەلارۋستە دە وتە جوعارى.
كەڭەس وداعى تاراعانىنا 30 جىلدان استى. قۇبىجىقتاي كورىنەتىن الەۋمەتتىك تەڭسىزدىگى، جۇمىسسىزدىعى، باسقا دا «ەركەلىكتەرى» بار مەملەكەتتىك-وليگارحتىق كاپيتاليزمدى قابىلداي المايتىن جاڭا بۋىن ءوسىپ شىقتى. باستى سەبەپ – وسىدا...
نازاربايەۆ 2011 جىلى ءبىر دوللار 125 تەڭگە بولعان كەزدە ورنىنان كەتكەندە ءقازىر ول «ۇلى ساياسي قايراتكەر» رەتىندە ەستە قالار ەدى. ءبىراق ونىڭ اقىرى كەرەمەت ساياسي ءمانسابىن شايىپ كەتتى. سوڭعى ون جىلدا نازاربايەۆقا ساياسات كەرەك ەمەس ەدى. 2011 جانە 2015 جىلدارى وتكەن ءىش پىستىراتىن ساياسي ناۋقان، ءۇش بىردەي ديەۆالۆاسيا توبەدەن جاي تۇسكەندەي اسەر ەتتى. حالىقتىڭ ۇلتتىق ۆاليۋتاعا دەگەن سەنىمى جويىلدى. ال ۇلتتىق ۆاليۋتا – مەملەكەتتىڭ ماڭىزدى اتريبۋتى.
