Búginde el-jurttyń saiasilanyp ketkeni – ómir shyndyǵy. Sondyqtan biraz aǵaiyn «Bilik partiiasynyń osy keńesinde partiia jetekshisi ne aitar eken? Jáne de usynystary eldi demokratiialandyrýǵa qandai áser eter eken?» degen úmit pen kúdik aralas kóńil-kúide bolǵany ras.
Biraq, úmit aqtala qoidy ma?
Bul suraqty qoiýyma bes negiz bar.
Birinshiden, ras, Elbasy kóńilge qonymdy biraz nárse aitty. Biraq onyń bári osyndai jiyndarda buryn da aitylyp kele jatqan, qulaq úirengen jaittar. Máselen, shaǵyn jáne orta biznesti damytý, halyqpen jandy bailanys ornatý, jemqorlyqpen kúres, shendilerdiń BAQ-qa jasap jatqan qysymy jáne taǵy basqa da beseneden belgili problemalar.
Biraq sońǵy kezde azyp-tozyp ketken eldiń óz basshysynan kútkeni bul emes edi!
Odan jurty, eń aldymen, sońǵy kezde erekshe ózekti bop ketken qoǵamdyq-saiasi ómirge qatysty novatsiialarǵa qatysty kesimdi oi-pikir kútip edi bul jurty. Biraq ol týraly Elbasy aita qoimady. Kerisinshe, ol zańdarǵa ózgeris engizý qajet emes degen syńaida sóz sóiledi. Úmittengen talai kóńil sý sepkendei basyldy.
Munyń ózi «Nur Otan» pliýralistik qoǵamda oryn alǵan kóńil-kúidi, ózine degen syni kózqarasty, saiasi allergiiany baiqaǵysy kelmeitinin taǵy da bir kórsetti dep sanaimyn!
Ekinshiden, demokratiialyq uiym bolǵysy keletin partiiany biýrokratiialyq stilde basqaryp, onyń jumysyn ushpaqqa shyǵarý tipti múmkin emes! Ázirshe, «Nur Otan» ujymdyq oi-pikirdiń emes, bir adamnyń jeke saiasi sheshimi negizinde ǵana qyzmet atqara alatyn uiym bop kórinip tur. Búkil ómiri, turmys-tirshiligi jalǵyz tulǵanyń baiandamasyna telinip qalǵan uiymnan ne qaiyr!
Úshinshiden, «Nur Otan» ózin qaita júktegisi keledi («perezagrýzka») eken.
Menińshe, partiiany ǵana emes, búkil qoǵamdyq-saiasi ómirdi qaita júkteý kerek! Ol úshin, eń aldymen, eldegi partiia zańnamasy men praktikasyn túbegeili ózgertý qajet! Bir partiiaǵa elden erekshe, ekskliýzivti qolaily jaǵdai jasap qoiyp, basqa partiialardy barlyq múmkindikterden aiyryp tastaý – eshkimge de opa bermeidi. Tek qana ashyq ári básekeli saiasi orta elimizde shynaiy partiiaaralyq ideia men tulǵalar jarysyn ornata alady, sonda ǵana ol partiialar ómirsheń bolady, halyqtyń jasandy emes, tabiǵi qoldaýyna ie bolady.
Áitpese, sailaý komissiialaryndaǵy óz múshelerine senip qalǵan «Nur Otan» óz qarsylastaryn sailaý qorytyndylaryn burmalaý arqyly ǵana «jeńe alatyn» monopolist-monstr retinde qala bermek!
Biraq ótken prezident sailaýynda dúniege kelip, yqpaldy kúshke ainalǵan baqylaýshylar endigi jerde ońai berile qoimaityny taǵy bar!
Ózine senimdi bolsa, «Nur Otan» Elbasy men prezidenttiń artyna jasyrynbai, olardyń ákimshilik resýrsyna sene bermei, basqa partiialarmen shynaiy básekege túsip kórsin! Ony, máselen, premer basqarsyn. Oǵan berilgen aqparattyq múmkindik basqa partiialarǵa da berilsin. Jańa partiialar qurylýy jeńildetilsin. Olardy tirkeý tártibi demokratiialandyrylsyn. Sailaý komisiialarynda barlyq partiia ókilderi engizilsin.
Mine, eldegi partiialyq ómir sonda ǵana jandanady, XXI ǵasyr talaptaryna laiyq, naǵyz órkenietti saiasi orta qalyptasady.
Elbasy «Nur Otan» jetekshi kúsh bolýy kerek deidi. Kezinde Sovet Odaǵynda Kommýnistik partiianyń jetekshi roli Konstitýtsiiada bekitilip qoiatyn. Ata Zańda jazylmasa da, bizde de is júzinde solai bolyp tur. Partiiaaralyq teńdik, iaǵni jumys isteýde teń múmkindikter joq! Menińshe, jetekshilik prezident jarlyǵymen ne basqa bir biýrokratiialyq sheshimmen ornamaidy, jetekshilik te demokratiialyq talaptarǵa sai bolýy tiis qubylys, ideialar men tulǵalardyń ashyq básekesi nátijesinde ǵana qol jetkizile alatyn biik mártebe bolýy tiis! Ol jaǵy bizde eki aiaǵynan aqsap tur!
Tórtinshi jaittyń salmaǵy basqasha bolyńqyrap turǵany. Kópten beri el aldyna shyqpaǵan Elbasy bul joly kei sátte partiiasyna ǵana emes, ózinen qoldaý kútken el-jurtqa da kóńili tolmai júrgendei bop kórindi.
Iá, is júzinde bas bilikti ýysynan shyǵara qoimaǵan onyń óz nókerlerine renjýi, jekirýi, qatty aitýy, kerek deseńiz, jerden alyp, jerge salýy oryndy bolar. Onyń ústine kózge uryp turǵan kemshilikter – shash etekten! Uryssa, shendilerge urysa bersin, oǵan qulaq ta, kóz de úirengen.
Biraq, halyqpen sóilesýdiń jóni bólek sekildi. Osynshama ýaqyt boiyna bar bilikti Tuńǵysh Prezident pen onyń ashkóz ainalasyna berip qoiǵan qaimana jurttyń ne jazyǵy bar?!
Men Elbasynyń áleýmettik qoldaý suraǵan jurt pen eki siyr týraly aitqan sózderin meńzep otyrmyn. Jeme-jemge kelgende, osynshama jyl bilikte tapjylmai otyryp alyp, el jaǵdaiynyń osynshama tómendep ketýine tikelei ári birden-bir jaýapty osy partiia emes pe?!
Konstitýtsiia boiynsha Qazaqstan – áleýmettik memleket, sondyqtan ókimet óziniń áleýmettik mindetterin oryndaýy qajet! Eger de aǵymdaǵy bilik halyqtan jinalǵan salyq pen jer qoinaýy bailyqtaryn satýdan túsken qyrýar qarjyny jarata almasa, ondai úkimettiń ne keregi bar?!
Kez kelgen saiasatker, onyń ishinde, el basqaryp otyrǵan tulǵa óz sózinde sheneýinikterdiń emes, halyqtyq múddeni alǵa tartyp sóileýi tiis dep sanaimyn!
Sondyqtan da áleýmettik qoldaýǵa muqtaj, túrli-túrli daǵdarystardan ábden sińir shyqqan jurtshylyq Elbasynyń dál osy sózderin jyly qabyldady dep aita almaimyn.
Besinshiden, óziniń sailaý zańnamasyna qatysty qatqyl oiyn bildirý arqyly Elbasy erteńgi kúni jinalǵaly otyrǵan Ulttyq keńestiń jumysynyń aýqymy men kún tártibin osy bastan shektep, tejep qoiǵan siiaqty. Óitkeni, el ishinde áli de «osy keńes saiasi zańdardy jetildiredi» degen úmit áli de bar. Biraq Elbasy kesip-piship aitty, iaǵni el aýzynda aityp júrgen ózekti ózgeristerdiń qaralýy ári qabyldanýy endigi jerde ekitalai bop qaldy.
