Saiasattanýshy Rasul Jumaly sailaýdań soń synǵa ushyraǵan Ámirjan Qosanov ara tústi. Onyń aitýynsha qoǵamnyń bir judyryqqa jumylýyna dál osy Qosanov sebepshi bolǵan. Jumaly oiyn bylaisha órbitken eken:
Ashý kelse, aqyl keter degen. Árine sailaýdan keiingi eldiń ókpesi men renishi, yzasy men narazylyǵy tolyq negizdi. Oǵan esh daý joq. Jáne másele tek sailaý qorytyndylarynda ǵana emes, Qazaq qoǵamynda talai jyldan beri sheshilmei kele jatqan bylyqtarda jatyr.
Biraq ózimiz ózimizge "ne boldy" jáne "budan keiin ne bolmaq" degen suraqqa jaýap bereiikshi. Áldekim qalt ketse, ony jabylyp tepkiniń astyna alatyn jaman ádetten arylý kerek.
Tek meniń oiymsha Ámirjan Qosanov qalt ketken joq. Nelikten deisiz ǵoi?
Aldymen kóptegen azamattar Ámirjan Qosanov bizdiń senimdi satyp ketti degennen bastaiyq. Ainalaiynym-aý, kimge satty, qalai satty? Satsa, onysy úshin nendei náfáqa alypty?
Men biletin Ámirjan myrza, bul dodadan keiin ysylyp-qairattanǵany bolmasa, sol baiaǵy adal da qarapaiym, halqym dep zarlaǵan Ámirjan. Bir ai uiqy kórmei qaljyraǵannan, kóptegen serikteriniń soqqysynan qynjylystan, tósek tartyp jatqan anasynanyń janynan tabyla almai sary ýaiymnan basqa ne kórdi osy kúnderi?
Sailaý nátijesin ekzitpoldan soń moiyndap qoidy dep kiná taǵady bireý. Sonda resmi nátijeden keiin moiyndasa, basqasha bolar ma edi?
Al sailaýshylardyń daýysy urlansa, oǵan kináliler ishinde Ámirjandy eń sońǵy orynda atar edim.
Óitkeni ondai qylmysqa barǵan ol emes, baqylaýshylardy shektegen ol emes, sailaýǵa qatyspa dep úgittegen qaita ol emes. Olai bolsa, halyqty kóshege nege shaqyrmady deidi kei aǵaiyn. Al shaqyrdy delik. Ol úndeýge qanshańyz sóz emes, is júzinde atsalysar edińiz?
Bilik te op-ońai moiyn usynady dep kim aitty? Al endi is nasyrǵa shapsa, jaýapkershilikti moiynyna qaisyńyz alar edińiz? Sondyqtan Ábekeńniń osy rettegi ustamdylyǵyn óz basym álsizdikke iá arzanqoldy saiasatkerlikke emes, tolysqan, bolashaqty oilaityn kemeńgerlikke balaimyn.
Ámirjanǵa árkimniń kózqarasy árqily bolýy múmkin. Alaida bireýge unasyn-unamasyn sońǵy jiyrma jylda Qazaqtyń basyn biriktirgen, oppozitsiiany zańdastyrǵan Ámirjan faktory boldy.
Áitpese basqa jol silteýshiler bolsa, qaida qaldy sheshýshi sátte? Eń bolmasa osyny moiyndasaq netti. Endi baryp osy upaidy enshilep artyrý ornyna qaita qaq jarylyp otyrǵan túrimiz. Ókinishti.
