ساياساتتانۋشى راسۇل جۇمالى سايلاۋداڭ سوڭ سىنعا ۇشىراعان ەمٸرجان قوسانوۆ ارا تٷستٸ. ونىڭ ايتۋىنشا قوعامنىڭ بٸر جۇدىرىققا جۇمىلۋىنا دەل وسى قوسانوۆ سەبەپشٸ بولعان. جۇمالى ويىن بىلايشا ٶربٸتكەن ەكەن:
اشۋ كەلسە, اقىل كەتەر دەگەن. ەرينە سايلاۋدان كەيٸنگٸ ەلدٸڭ ٶكپەسٸ مەن رەنٸشٸ, ىزاسى مەن نارازىلىعى تولىق نەگٸزدٸ. وعان ەش داۋ جوق. جەنە مەسەلە تەك سايلاۋ قورىتىندىلارىندا عانا ەمەس, قازاق قوعامىندا تالاي جىلدان بەرٸ شەشٸلمەي كەلە جاتقان بىلىقتاردا جاتىر.
بٸراق ٶزٸمٸز ٶزٸمٸزگە "نە بولدى" جەنە "بۇدان كەيٸن نە بولماق" دەگەن سۇراققا جاۋاپ بەرەيٸكشٸ. ەلدەكٸم قالت كەتسە, ونى جابىلىپ تەپكٸنٸڭ استىنا الاتىن جامان ەدەتتەن ارىلۋ كەرەك.
تەك مەنٸڭ ويىمشا ەمٸرجان قوسانوۆ قالت كەتكەن جوق. نەلٸكتەن دەيسٸز عوي?
الدىمەن كٶپتەگەن ازاماتتار ەمٸرجان قوسانوۆ بٸزدٸڭ سەنٸمدٸ ساتىپ كەتتٸ دەگەننەن باستايىق. اينالايىنىم-اۋ, كٸمگە ساتتى, قالاي ساتتى? ساتسا, ونىسى ٷشٸن نەندەي نەفەقا الىپتى?
مەن بٸلەتٸن ەمٸرجان مىرزا, بۇل دودادان كەيٸن ىسىلىپ-قايراتتانعانى بولماسا, سول باياعى ادال دا قاراپايىم, حالقىم دەپ زارلاعان ەمٸرجان. بٸر اي ۇيقى كٶرمەي قالجىراعاننان, كٶپتەگەن سەرٸكتەرٸنٸڭ سوققىسىنان قىنجىلىستان, تٶسەك تارتىپ جاتقان اناسىنانىڭ جانىنان تابىلا الماي سارى ۋايىمنان باسقا نە كٶردٸ وسى كٷندەرٸ?
سايلاۋ نەتيجەسٸن ەكزيتپولدان سوڭ مويىنداپ قويدى دەپ كٸنە تاعادى بٸرەۋ. سوندا رەسمي نەتيجەدەن كەيٸن مويىنداسا, باسقاشا بولار ما ەدٸ?
ال سايلاۋشىلاردىڭ داۋىسى ۇرلانسا, وعان كٸنەلٸلەر ٸشٸندە ەمٸرجاندى ەڭ سوڭعى ورىندا اتار ەدٸم.
ٶيتكەنٸ ونداي قىلمىسقا بارعان ول ەمەس, باقىلاۋشىلاردى شەكتەگەن ول ەمەس, سايلاۋعا قاتىسپا دەپ ٷگٸتتەگەن قايتا ول ەمەس. ولاي بولسا, حالىقتى كٶشەگە نەگە شاقىرمادى دەيدٸ كەي اعايىن. ال شاقىردى دەلٸك. ول ٷندەۋگە قانشاڭىز سٶز ەمەس, ٸس جٷزٸندە اتسالىسار ەدٸڭٸز?
بيلٸك تە وپ-وڭاي مويىن ۇسىنادى دەپ كٸم ايتتى? ال ەندٸ ٸس ناسىرعا شاپسا, جاۋاپكەرشٸلٸكتٸ مويىنىنا قايسىڭىز الار ەدٸڭٸز? سوندىقتان ەبەكەڭنٸڭ وسى رەتتەگٸ ۇستامدىلىعىن ٶز باسىم ەلسٸزدٸككە يە ارزانقولدى ساياساتكەرلٸككە ەمەس, تولىسقان, بولاشاقتى ويلايتىن كەمەڭگەرلٸككە بالايمىن.
ەمٸرجانعا ەركٸمنٸڭ كٶزقاراسى ەرقيلى بولۋى مٷمكٸن. الايدا بٸرەۋگە ۇناسىن-ۇناماسىن سوڭعى جيىرما جىلدا قازاقتىڭ باسىن بٸرٸكتٸرگەن, وپپوزيتسييانى زاڭداستىرعان ەمٸرجان فاكتورى بولدى.
ەيتپەسە باسقا جول سٸلتەۋشٸلەر بولسا, قايدا قالدى شەشۋشٸ سەتتە? ەڭ بولماسا وسىنى مويىنداساق نەتتٸ. ەندٸ بارىپ وسى ۇپايدى ەنشٸلەپ ارتىرۋ ورنىنا قايتا قاق جارىلىپ وتىرعان تٷرٸمٸز. ٶكٸنٸشتٸ.
