Kásipker Almas Ábdiǵapparov ordanews.kz bergen suqbatynda óziniń qýǵynǵa ushyraý oqiǵasymen jáne kásibinen reiderlik jolmen qalai qaǵylǵanyn baiandap berdi, dep habarlaidy Dalanews.kz.
Urlyq isi 2021 jyly bir bettik málimdeme negizinde ashylǵan. Al zań boiynsha kez kelgen urlyq aýditorlyq qorytyndymen rastalyp, keltirilgen zalal mólsheri naqty kórsetilýi tiis bolatyn. Alaida mundai dálelderdiń eshqaisysy qajet bolmaǵan. Almaty politsiia departamenti málimdemeni sabyrly túrde qabyldap, qylmystyq is qozǵaidy.
“Olar meni ústińizden is qozǵalyp jatyr degen maqsatpen suraq qoiýǵa shaqyrǵan emes. Al aryzymdy bergen kúni bir aptadan keiin meni ustady. Eki kúnniń ishinde sot otyrysy bolyp, meni eki ai qamaýǵa aldy. Osylaisha qylmystyq is qozǵalyp, 420 million teńgeni quraityn biraz shyǵyn keltirildi. Osy rette meniń advokattarym 517 million kepilmen úiqamaqqa bosatýdy surady. Sotqa keltirilgen zalaldyń barlyǵyn óteitin naqty aktivter bar. Biraq sot bas tartty. Al prokýror “sen kópshilikke belgili tulǵasyń. Bul óz kezeginde qoǵamǵa qaýipti” degen ýáj aitty. Tergeýge qolaily jaǵdai jasap, meni eki aiǵa qamap qoidy”, deidi Ábdiǵapparov.
Osy kezde kásipker Esentai City qurylysyna jeke kepildikpen 20 million dollarǵa nesie alǵanyn aitady.
“Nesieniń barlyq somasyna bank aldynda jeke jaýap beretin bolsam, million dollardy urlaýdyń máni nede? Bul dálelder tyńdalmady. Muny sot meniń paidama sheshken joq. Óitkeni Qospaev siiaqty adamdardyń múmkindikteri men bailanystary sheksiz. Ol Almaty qalasynyń prokýrory Júiriktaevpen jaqyn dos bolǵanyn ári ishki ister basqarmasynyń bastyǵy Taimerdenovpen jaqsy qarym-qatynasta bolǵanyn maqtan tutatyn”, deidi ol.
Kásipkerdiń aitýynsha, joba 2016 jyldyń basynan beri josparlanǵan. Tipti birneshe ai boiy talqylanǵanyn da alǵa tartty.
“Bul tolyǵymen meniń ideiam men kelisimderim. Qatelespesem, qyrkúiekte Kazkommertsbankpen yntymaqtastyq týraly kelisimge qol qoidym. Kelisimshart jasasqan soń Dostan Ábijanov meni Eldos Qospaevpen (Bolat Nazarbaevtyń kómekshisi) jáne Bekzat Úsenovpen (Qundyz Nazarbaevanyń kúieýi) kezdesýge shaqyrdy. Ol investitsiia quiýǵa qyzyǵýshylyq tanytqandar bar ekenin aitty. Alaida Qospaev ár nársege agressivti kózqaraspen qarady”, deidi Ábdiǵapparov.
Kezdesý barysynda ekinshi tarap kásipkerge ashyq túrde qoqan-loqy kórsetken. Oǵan bul jobany júzege asyrýǵa múmkindik te, ruqsat ta berilmeitinin aitqan. Tipti túrmege otyrǵyzamyz nemese basqa da qiyn máseleler týyndaitynyn aityp tikelei shabýyl jasaǵan. Al bul adamdar jobaǵa qosylǵan jaǵdaida eshqandai qiyndyq bolmaitynyn aityp sendirgen eken.
“Olar 50%-yn surady. Osydan keiin durys jumys istei alatynyn jetkizgen. Men qalai budan bas tarta alamyn? 2016 jyly taǵy qandai tańdaý boldy? Bul men úshin úlken qaýip boldy. Sondyqtan qoryqqanymnan, ne isterimdi bilmedim. Nátijesinde bul áńgime olardyń 40 paiyzǵa kelisýimen aiaqtaldy. Iaǵni, 10 paiyzy Qospaevqa, 30 paiyzy men eshqashan óz kózimmen kórmegen Nazarbaevqa berildi” dep jetkizdi kásipker.
