Birikken Arab Ámirlikteriniń astanasy Ábý-Dabıde qorǵanys mınıstrliginiń basshysy general-polkovnık Rýslan Jaqsylyqov bastaǵan Qazaqstannyń áskerı delegasıasy kelissózder júrgizip, qorǵanys-ónerkásip keshenderi kásiporyndarynyń ónimderimen tanysty, dep habarlaıdy Dalanews.kz.

Sapar aıasynda BAÁ vıse-prezıdent Mansýr ıbn Zaıd Ál Nahaıanmen hattamalyq kezdesý ótti. Onda qorǵanys salasyndaǵy ekijaqty ózara is-qımyldyń perspektıvalary talqylandy.

Sonymen qatar Armıa úıinde general-polkovnık Rýslan Jaqsylyqov pen qorǵanys isteri jónindegi memlekettik mınıstr Muhammed ben Múbarak Fadel ál-Mazrýı ózara múddeli yntymaqtastyq baǵyttaryn talqylady.

BAÁ qorǵanys-ónerkásip kesheni kásiporyndarynyń qyzmetimen tanysý maqsatynda qazaqstandyq delegasıa Tawazun Industrial park ındýstrıalyq parkinde boldy. Onda áskerı maqsattaǵy ónimder shyǵaratyn «Nımr», «Karakal», «Halkon» jáne «Adası» kompanıalary jumys isteıdi.

Áskerı qyzmetshiler áskerı tehnıka men qarý-jaraqtyń taktıkalyq-tehnıkalyq sıpattamalaryn zerdeledi. Olardyń qataryna jaýyngerlik saýytty mashınalar, atys qarýy, joǵary dáldiktegi basqarylatyn jáne túzetiletin avıasıalyq bomba, tikushaq tıpti ushqyshsyz ushý apparattary jáne joǵary qashyqtyqtaǵy tosqaýyldaýshy oq-dáriler kiredi.

Bul Qazaqstan tarıhyndaǵy Qorǵanys mınıstriniń Birikken Arab Ámirlikterine alǵashqy resmı sapary ekenin aıta ketý kerek.