Masanchi jáne Sortóbe aýylynda turatyn dunǵandar biylǵa jemis-jidek, kókónis ekpegen. Sebebi erteńgi kúnge senimdi emes. Olar qaqtyǵys taǵy qaitalanady dep qaýiptenedi.
Dunǵandardyń úreiin seiiltý úshin atalǵan eki aýylǵa Qordaidyń ákimi kelip ketip, jaǵdaidy baqylaýda ustaýǵa ýáde etken ári úirenshikti kásibine qaita kóshýge shaqyrǵan.
"Áitse de Qordaida turatyn dunǵan qaýymy baý-baqsha qamyna áli kirispegen, kiriskisi de joq. Ákimniń ýádesi olardyń kókeiindegi kúdikti seiiltpegen", - deidi tilshi.
Al dunǵandardyń birazy Qazaqstannan ketkisi keletinin aitypty.
"Ákim kelip ketti. "Baý-baqsha qamyna kirise berińizder, qaýipsizdikti saqtaý bizdiń moinymyzda" dep sendirdi. Sonda da bolsa kúmán kóp. Burynǵydai ynta-yqylas joq. Jer emgen jurt edik, ótken jolǵy oqiǵadan keiin betimiz qaityp qaldy. Kópshiligi Qazaqstannan kóshkisi keledi. Bala-shaǵasyna alańdaidy. Bilik endigári mundaiǵa jol bermeimiz dep otyr. Erterek oilanýy kerek edi...", – degen eken Qordaida turatyn dunǵan azamaty.
Jergilikti jurttyń aitýynsha sońǵy aida Qordaidan 10 dunǵan otbasy kóship ketken jáne bul basy ǵana. Tilshimen saýaldasqan dunǵandardyń birazy Qazaqstannan kóshýge tas-túiin daiyn otyrǵanyn aitqan.
Bet alysy - Reseidiń Krasnodar aimaǵy, Saratov jáne Volgograd oblysy.
"Birinshiden, bul jaqtyń topyraǵy qunarly. Igerilmei bos jatqan jer, qaraýsyz qalǵan eldi-meken kóp. Onyń ústine atalǵan aimaqtarda azdy-kópti dunǵandar turady. Aǵaiyn-týystyń janyna baramyz.
Qazaqstannan ketkenmen, ashtan ólmespiz, kóshten qalmaspyz. Jer emgen jurtpyz, joǵalmaimyz", – depti Qordaida turatyn taǵy bir dunǵan azamaty.
"Qazaqstannan qonys aýdarǵan jaǵdaida úidi kimge qaldyrasyz?" degen tilshi saýalyna: "Satamyn. Satylmasa traktarmen taptap, jermen-jeksen etemin. Eshkimge buiyrmasyn..." dep jaýap qatqan.
...
1 naýryz Alǵys aitý kúni Jambyl oblysynyń Qordai aýdanyna kelgen prezident Toqaev bul oqiǵa memleketke nuqsan keltirdi dep málimdegen.
"Endi tutas ult bolyp osyndai keleńsizdikten sabaq alýymyz kerek. Eń aldymen, keleshekte mundai qasiretti boldyrmaý úshin tiisti shara qoldanýymyz qajet, – dep atap ótken Prezident.
Prezident tergeý jumystary zańǵa sáikes júrgiziletinin, zań aldynda bári teń ekenin aityp, Qordaidaǵy jergilikti qyzmetkerlerdiń para alý jáne shekara arqyly zańsyz saýda jasaý máselelerin sheshýdi tapsyrǵan.
– Aýdanda bir top adam belsendi túrde kontrabandamen ainalysyp júrgen. Bul – belgili nárse. Osy iske basqa top ta qatysqysy kelgen.
Bir sózben aitsaq, zańsyz tabys kózi úshin eki qylmystyq toptyń arasynda teketires paida bolǵan. Bul teketires saldarynan kóp adam zardap shekti. 11 adam qaza tapty.
Ony ashyq aitý kerek. Endi quqyq qorǵaý organdarynyń aldynda turǵan maqsat – barlyq qylmyskerlerdi ultyna qaramai, zańǵa sáikes jazaǵa tartý. Onsyz elimizde tártip bolmaidy, – degen bolatyn Toqaev.
