20 jastaǵy almatylyq bloger Dýlat Nábiev «Virýs» jobasyn qolǵa alyp, onyń aiasynda «90 kún – taza qala úshin» atty ekochellendj bastady. Ol óz bastamalary arqyly almatylyqtardy qorshaǵan ortaǵa uqypty qaraýǵa shaqyryp, jastardyń ekosanasyn qalyptastyrýǵa jáne qala tazalyǵyn saqtaýǵa belsendi qatysýǵa yntalandyryp júr. Búgin ol seriktesterimen birge «Sairan» kóli jaǵalaýyndaǵy qoqystardy jinady,- dep habarlaidy Dalanews.kz
«Almatyda júrgenime bir jyldan asa ýaqyt boldy. Buǵan deiin Instagram-da basqa baǵyttaǵy kontentpen ainalysatynmyn. Keiin baýyrym, onkolog Daniiar Jumataevpen aqyldasyp, baǵytymyzdy ózgertýdi uiǵardyq. Sóitip ekochellendjimiz bastaldy. Basty maqsatymyz – 90 kún ishinde elimizdi qoqystan tazartý ári áleýmettik jeli arqyly jastarǵa durys qundylyqtardy, tabiǵat pen týǵan qalaǵa degen súiispenshilikti darytý», – deidi bloger.
Aita keteiik, chellendj 1 maýsymda Almatyda bastaldy. Dýlat bastaǵan top kóshelerdi tazalaýdan kiristi.
«Alǵashqy kúni nebári on qap jinadyq, tipti qoqysty qalai durys jinaýdy da bilmedik. Alǵashqy 5–10 kúnniń ishinde kúnine 10 qaptan shyǵardyq. Keiin bul jumystardy Instagram men TikTok-ta jariialai bastadyq. Qoldaýshylarymyz kóp bola qoimasa da, halyqtyń yqylasy bizge úlken demeý berdi», – deidi ol.
«Bir kúni keshkisin Sairanǵa bardyq. Ol kezde saiabaq resmi ashylmaǵan, shomylýǵa ruqsat joq edi. Biraq adamdar arbýz jep, qoqysyn, jaialyqtaryn tastap ketetin. Ádemi jasyl aimaqtyń qoqysqa tolyp ketkenin kórip, osy jerdi tazalaýǵa bekindik. Chellendjdiń 13-kúni Sairandy jinadyq: ár 5–10 metr saiyn 10–11 qap qoqys shyǵatyn. Volonter tartý úshin áleýmettik jelide úndeý jariialadym, alty adam qosyldy», – deidi Dýlat.
«Sodan bastap tańǵy 5:00-de Sairanda jinalatyn boldyq. Kún saiyn 30–40 qap qoqys shyǵardyq», – deidi ol.
Qazir onyń komandasynda marketolog, videograf, SMM-mamany bar. Eriktilerdiń qatary da kún sanap kóbeiip keledi. Bloger áleýmettik jeliler arqyly jastarǵa ekologiialyq oi qalyptastyrýǵa erekshe mán berip otyr.
«Osy ýaqyt ishinde tórt qalada boldym: Almaty, Shymkent, Jarkent, Jetisai. Almatyda bizge 30-ǵa jýyq adam qosyldy. Shymkentte 200-den astam jas erikti birge shyqty, Jarkentte – 150, Jetisaida – 100. Barlyǵy tórt qalada 400–500 eriktimen jumys istedik», – deidi ol.
Chellendj nátijesinde bloger jastarmen birge Almatyny nebári 28 kúnde tazartty. Keiin Shymkentte eki apta eńbek etip, odan soń Jarkent pen Jetisaiǵa bardy.
«Bastapqy maqsatymyz Almatyny 90 kúnde tazalaý bolatyn. Biraq «Virýs» jobasy jai ǵana qoqys jinaýdan áldeqaida aýqymdy bastamaǵa ainaldy. Eń bastysy – kóptegen adamǵa tazalyq mádenietin daryta aldyq dep oilaimyn», – dep qorytyndylady Dýlat Nábiev.
