Ekologiia jáne tabiǵi resýrstardy qorǵaý ministri Erlan Nysanbaev Qazaqstanda qoqys úiindilerin joiý jumystarynyń tiimdiligi artyp kele jatqanyn jetkizdi. Aitýynsha, ótken jyly 164 laýazymdy tulǵa 9,4 mln teńge kóleminde aiyppul tólegen, dep habarlaidy Dalanews.kz.
Ministrdiń sózinshe, spýtniktik tehnologiialar ekologiia salasyndaǵy zań buzýshylyqtardy anyqtaý men joiýdyń negizgi quraldarynyń birine ainaldy. “Qazaqstan Ǵarysh Sapary” kompaniiasy bergen málimetterge súiene otyryp, aýmaqtyq ekologiia departamentteri qoqys úiindilerin tirkep, jergilikti ákimdikterge olardy joiý týraly tapsyrmalar beredi. Ákimdikter áreketsiz qalǵan jaǵdaida, jaýapty tulǵalar ákimshilik jaýapkershilikke tartylady.
Erlan Nysanbaevtyń derekteri boiynsha, 2024 jyly zań buzǵan 164 laýazymdy tulǵa 9,4 mln teńge kóleminde aiyppul tólegen. Olardyń qatarynda aýdan jáne qala ákimderiniń orynbasarlary bar, 61 tulǵaǵa shara qoldanylǵan.
“Sońǵy jyldary qoqys úiindileriniń sany aitarlyqtai azaidy. Eger 2018 jyly 8,7 myńnan astam qoqys orny anyqtalyp, tek 57%-y joiylsa, 2024 jyly bul kórsetkish shamamen 4,8 myńǵa deiin qysqaryp, onyń 91%-y joiyldy”, — dedi ol.
Ekologiia ministrliginiń málimdeýinshe, bul kórsetkishter qorshaǵan ortany qorǵaý sharalarynyń tiimdiligi artqanyn kórsetedi.
