Shymkent qalasy ákiminiń orynbasary Rýslan Berdenov, biyl sáýir aiynda ózine jasalǵan qarýly shabýyldan keiin, sotta jeke kýálik berýge nietti. Bul týraly onyń ókili Jeńis Tynybek málimdedi, dep habarlaidy Dalanews.kz.
Tynybektiń aitýynsha, búgin, 12 tamyzda Berdenovke ota jasaldy. Qazirgi jaǵdaiy týraly naqty málimet joq. Degenmen ol dárigerler ruqsat bergen boida sot zalyna kelip, bolǵan jaitty egjei-tegjeili aityp berýge daiyn.
“Búgin oǵan operatsiia jasaldy. Dárigerler ruqsat etken sátte kýálik beredi dep josparlap otyrmyz. Ózi de “sotqa baramyn, bárin tolyq aityp beremin” dep otyr. Jienbaidyń alǵashqy sotta sóilegen 45 minýttyq sóziniń birde-biri shyndyqqa janaspaidy. Onyń óz áieline kúie jaǵatyn málimdemeleri orynsyz”, – dedi Tynybek.
Sonymen qatar jábirlenýshiniń ókili tergeý barysynda aiyptalýshy jáne onyń qorǵaýshysymen kezdeskenin aitty. Áńgime kezinde qarsy tarap aqparattyq shabýylmen qorqytqan.
“Olar bizge kelip: “Soǵys bolady” dep eskertti. Jaraidy, soǵysyńdar, biz zańgermiz. “Eger qarsy usynys bolmasa, soǵys bastalady. Aqparattyq turǵydan qurtamyz, Berdenovtiń mansabyna núkte qoiamyz” dep ashyq aitty”, – dedi ol.
Sottaǵy tyń málimetter
Qazir Shymkentte Berdenovke qastandyq jasaý isi boiynsha sot jalǵasýda. Buǵan deiin sýdia 28 shildede jábirlenýshiniń ózi sotqa qatysýy qajet ekenin aitqan edi.
Búgin sotta Berdenovtiń kómekshisi Talap Rahymberdiev kýálik berip, aiyptalýshynyń telefon arqyly qorqytqanyn rastady. Al qurylys nysandaryn baqylaý bóliminiń basshysy Amanǵali Kenjebekov Jienbaidy jumystan bosatý josparlanǵanyn málimdedi.
